რამდენიმე წუთის წინ, დავით უსუფაშვილმა განაცხადა, რომ რესპუბლიკურ პარტიას ტოვებს. ის დამოუკიდებლად აპირებს ოპოზიციაში ყოფნას და მომავალი თვეების განმავლობაში კონსულტაციების გამართვას გეგმავს:

"მომავალი 2-3 თვის განმავლობაში მე მექნება ინტენსიური დიალოგი ყველასთან, ვინც არ დაღლილა დამოუკიდებელი, თავისუფალი, ევროპული, დემოკრატიული საქართველოს მშენებლობის პრობლემებით".

უსუფაშვილმა მადლობა გადაუხადა ყოფილ თანაგუნდელებს:

"მე ამ პარტიაში ავიდგი ფეხი, მე პოლიტიკოსად დავით ბერძენიშვილმა მაქცია, პერსონალურად, ამიტომ მე მას ვუხდი განსაკუთრებულ მადლობას. სხვადასხვა ფლანგიდან, მაგრამ კვლავ ერთად გავაგრძელებთ ბრძოლას საქართველოს წინსვლისთვის".

უსუფაშვილმა განაცხადა, რომ 2020 წლის საპარლამენტო არჩევნებში ახალი ტიპის პოლიტიკურმა ძალამ უნდა გაიმარჯვოს, რომელსაც ქვეყნის მართვის სრულფასოვანი რესურსი ექნება.