ერთიანი ნაციონალური მოძრაობის წევრი მიხეილ მაჭავარიანი პოლიტიკური საქმიანობისგან მინიმუმ მომდევნო 4 წლის განმავლობაში შეისვენებს. ამის შესახებ მაჭავარიანი ინტერპრესნიუსს ესაუბრა:

"ვიღებ პოლიტიკურ ტაიმ-აუტს, თუნდაც, რომ მომიწიოს შესვლა პარლამენტში, ვერ ვხედავ რესურსს ის საქმე გავაკეთო რაც მე მაინტერესებს. ეს პარლამენტი ეკონომიკაში არაფერს შეცვლის. რა ეკონომიკური საკითხებიც არ უნდა წამოგვეწია, გვპასუხობდნენ რა დროს ეკონომიკაა, ყველაფერი კარგად არისო. 27 ადამიანი შედის ჩვენგან პარლამენტში, ვიბრძვით მაჟორიტარებისთვის და თუ მოგვიწია კიდევ შესვლა, უმჯობესია ახალი ადამიანები შევიდნენ, ვისაც მეტი გამოწვევა ექნებათ."

IPN-ის ინფორმაციით, ამ პერიოდის განმავლობაში მაჭავარიანი აპირებს დაიცვას დისერტაცია პოლიტიკურ მეცნიერებებში, ხოლო მისი ტაიმ-აუტი პარტიის დატოვებას არ ნიშნავს:

"რაღაც საკითხებზე ვიქნები აქტიური, გავაქტიურდები ”ფეისბუქზეც”. შესაძლოა, პარტიის სახელით აღარ გავაკეთოთ ბრიფინგები, თუმცა დავეხმარები და მხარს დავუჭერ, რადგან ძალიან კარგი ხალხია ამ პარტიაში და ერთი მსოფლმხედველობა გვაქვს."

8 ოქტომბერს, საპარლამენტო არჩევნების დღეს, ენმ-მა პარტიული სიით 27 მანდატი მოიპოვა, მიხეილ მაჭავარიანი კი 32-ე ნომერი იყო, რაც იმას ნიშნავს, რომ პირველი ტურის შედეგად იგი პარლამენტს გარეთ დარჩა.