"დავიფიცები თუ გნებავთ, ვერ ააშენებენ", — ასე გამოეხმაურა თბილისის ვიცე-მერი, ირაკლი ხმალაძე ვაკის პარკში სასტუმროს მშენებელი კომპანიის განცხადებას სამუშაოების განახლებაზე. დღეს, 23 იანვარს ჟურნალისტებთან საუბრისას ხმალაძემ თქვა, რომ არ იღებს ინვესტორის ბრალდებებს შეთავაზებების არგაკეთებაზე:

"ერთი წელია მიდის ეს მოლაპარაკებები. ერთი ფართი არ შეგვითავაზებია, რამდენიმე შევთავაზეთ და ამაზეც უარი განაცხადეს. მეც და თქვენც ერთად ვნახოთ, რას ააშენებენ, სასტუმროს არა, ალბათ, 9-სართულიანი კორპუსის მშენებლობის ნებართვას მივცემთ, თუ მეტის სურვილი არ ექნებათ. გამორიცხული არის, რასაც ისინი იძახიან, არ მივიღებთ ასეთ ბრალდებებს. მათი ქონება არის ძალიან დიდ თანხად შეფასებული და მაგხელა ქონების თავის მოყრა ძალიან რთულია. ამის მიუხედავად, ვაკის პარკის ტერიტორიაზე, ის, რისი მშენებლობაც მათ უნდათ, არ მოხდება. კიდევ ერთი წელი რომ გაგრძელდეს მოლაპარაკებბეი და კიდევ რომ ვერ შევთანხმდეთ, მაინც ვერ ააშენებენ".

ინვესტორი კომპანია ვაკის პარკში სასტუმრო ბუდაპეშტის მშენებლობის განახლებას გეგმავს. ტიფლის კოსტავას დირექტორი, გიორგი ზაქაიძე აცხადებს, რომ რამდენიმე დღეში ტენდერით შეარჩევენ სამშენებლო კომპანიას და დაიწყებენ სამუშაოებს. მისი თქმით, მათ აქვთ სამშენებლო ნებართვა და სამივე ინსტანციის სასამართლო გადაწყვეტილება, მშენებლობის უფლებაზე.

გიორგი ზაქაიძის თქმით, კომპანიამ აუდიტორული დასკვნა წარუდგინა მერიას, რის საფუძველზეც უნდა აენაზღაურებინათ მათივე ინვესტიცია, თუმცა როგორც ამბობს, მათთვის სასურველი შეთავაზება ამ დრომდე ვერ მიიღეს.