ტელეკომპანია იმედის ინფორმაციით, ორგანიზაცია საქართველოს პოლიტოლოგთა ასოციაციის და დემოკრატიული ცვლილებების ცენტრის წარმომადგენლებმა რუსთაველის გამზირზე გიორგი რურუას მხარდამჭერ პლაკატებს მისი საწინააღმდეგო სტიკერები წარწერით — "გიორგი რურუას მიერ განწირული თაობა" გადააკრეს.

როგორც რურუას საწინააღმდეგო სტიკერების გამკვრელები ამბობენ, მათი ქმედება არის კონტრაქცია იმ აქციისა, რომელიც რამდენიმე საათის წინ სამოქალაქო აქტივისტებმა გამართეს. მათივე თქმით, პოლიტიკა "კრიმინალებისთვის" თავშესაფარი არ არის.

"ეს არის კონტრაქცია, რადგან არ შეიძლება კრიმინალი ადამიანი წარმოვაჩინოთ გმირად. მისი ისტორია იწყება მხედრიონიდან და მხედრიონში ნამყოფი ადამიანი არ შეიძლება წარმოდგენილი იყოს გმირად და ჩირქი მოსცხო პოლიციის რეპუტაციას", — აცხადებენ აქციის მონაწილეები.

სამოქალაქო აქტივისტებმა თბილისში, რუსთაველზე იმ პოლიციელების ფოტოები გააკრეს, ვინც გიორგი რურუას დაკავებაში მონაწილეობდა. პლაკატებზე არის წარწერა — "მე ჩავუდე იარაღი გიორგი რურუას".

გიორგი რურუა 2019 წლის 18 ნოემბერს იარაღის უკანონო ტარების ბრალდებით დააკავეს. მისი უფლებადამცველი და პარტნიორი ნიკა გვარამია აცხადებენ, რომ გიორგი რურუას იარაღი ჩაუდეს. დაკავებული ბრალს არ აღიარებს და ამბობს, რომ იარაღი მას საერთოდ არ უნახავს.

მოგვიანებით პროკურატურამ გიორგი რურუას ბრალი დაუმძიმა. უწყების განცხადებით, ბრალს დაემატება ახალი მუხლი სასამართლო გადაწყვეტილების შეუსრულებლობისა და მისი შესრულებისათვის ხელის შეშლის შესახებ. ბრალდების მხარე აცხადებს, რომ გიორგი რურუამ უარი განაცხადა სასამართლოს განჩინების მიხედვით დნმ-სა და ხელის კვლევების ნიმუშის აღების თაობაზე.