შემოსავლების სამსახურის ცნობით, 18 იანვარს თბილისის აეროპორტში უცხო ქვეყნის მოქალაქეს ბარგში დიდი ოდენობით, 8,1 კილოგრამი მარიხუანა აღმოაჩინეს. მათი თქმით, საქმის მასალები შინაგან საქმეთა სამინისტროს ცენტრალური კრიმინალური პოლიციის დეპარტამენტს გადაეცა. სამართალდამცველებმა სამხრეთ აფრიკის რესპუბლიკის მოქალაქე, 1978 წელს დაბადებული პირი დააკავეს.

კრიმინალური პოლიციის დეპარტამენტში აღიძრა სისხლის სამართლის საქმე. საქმეზე გამოძიება მიმდინარეობს განსაკუთრებით დიდი ოდენობით კანაფის ან მარიხუანის უკანონო შეძენა, შენახვა, გადაზიდვისა და საქართველოში უკანონოდ შემოტანის ბრალდებით. დანაშაული გათვალისწინებულია სისხლის სამართლის კოდექსის 273¹ მუხლის მე-6 ნაწილით და 262-ე მუხლის მე-4 ნაწილის "ა" ქვეპუნქტით, რაც ორიდან ექვს წლამდე, ან უვადო თავისუფლების აღკვეთას ითვალისწინებს.

ეს პირველი შემთხვევა არაა, როდესაც უცხო ქვეყნის მოქალაქეებს თბილისის აეროპორტში დიდი ოდენობით მარიხუანა შემოაქვთ. 27 ივლისს სამხრეთ აფრიკიდან მომავალი მგზავრის კუთვნილ ხელბარგში 20 კილოგრამი მარიხუანა აღმოაჩინეს. ხოლო, ოქტომბერში, ასევე, აეროპორტში 23 კილოგრამი მარიხუანა იპოვეს.