მოძრაობა ლელოს დამფუძნებელი, მამუკა ხაზარაძე აცხადებს, რომ ქართული ოცნების დეპუტატთან, ანრი ოხანაშვილთან კონფლიქტის შემდეგ დაკავებული პირი, ვახტანგ რობაქიძე მისი თანაგუნდელია. ამის შესახებ მან თბილისის საქალაქო სასამართლოსთან ჟურნალისტებს უთხრა.

ხაზარაძე ამბობს, რომ კონფლიქტის დეტალების გარკვევის შემდეგ შესაბამის ზომებს მიიღებენ. ლელოს დამფუძნებელი, ასევე, განმარტავს, რომ რობაქიძე 2012-2017 წლებში ქართული ოცნების წევრი და ახალგაზრდული ფრთის ლიდერი იყო.

"ჩვენ ვნახავთ რა მოხდა. არ ვიცი დეტალურად რა მოხდა და ვერ დავეყრდნობით ინფორმაციას, რომელიც თქვა ოხანაშვილმა იმიტომ, რომ, პირდაპირ გეტყვით, რომ ოხანაშვილმა მთელი საქართველო მოატყუა და შეიძლება ახლაც ტყუის", — აღნიშნა ხაზარაძემ.

შინაგან საქმეთა სამინისტროს ინფორმაციით, პოლიციელის მოთხოვნის დაუმორჩილებლობისთვის დააკავეს პირი, რომელმაც მანამდე ქართული ოცნების დეპუტატს სიტყვიერი შეურაცხყოფა მიაყენა და დაემუქრა. როგორც რუსთავი 2 წერს, შემთხვევა 14 იანვარს ბაკურიანში მოხდა.

როგორ ოხანაშვილი ამბობს, ის ოჯახთან ერთად ერთ-ერთი კაფეში იჯდა, როდესაც უცნობმა მას სიტყვიერი შეურაცხყოფა მიაყენა და დაემუქრა. მისივე თქმით, ფიზიკური დაპირისპირება არ ყოფილა.

შსს-ში აცხადებენ, რომ რობაქიძე ზოგადი ადმინისტრაციული კოდექსის 173-ე მუხლით არის დაკავებული, თუმცა დეპუტატის მიმართ მუქარის გამო გამოძიება სისხლის სამართლის კოდექსის 151-ე მუხლით დაიწყო. პრესსამსახურში არ აკონკრეტებენ, რა მიიჩნია დეპუტატმა მუქარად და კონკრეტულად რა შინაარსის ნათქვამის გამო დაიწყო გამოძიება.