ნაციონალური მოძრაობის წევრი, სალომე სამადაშვილი მიხეილ სააკაშვილის განცხადებაზე ხელისუფლების დამხობასთან დაკავშირებით განმარტავს რა განსხვავებაა დამხობასა და რევოლუციურ გადატრიალებას შორის. მისი თქმით, ვისაც რევოლუცია ელანდება და ეშინია, ის სააკაშვილის ნათქვამს ასეთ ინტერპრეტაციას აძლევს.

"20 ივნისის მოვლენებს აუცილებლად უნდა მოჰყოლოდა ხელისუფლების, თუ გინდათ დამხობა დაარქვით, გინდათ გადადგომა და გინდათ ჩამოშლა... დამხობა არ ნიშნავს მაინცდამაინც რევოლუციურ გადატრიალებას", — განაცხადა სამადაშვილმა TV პირველის ეთერში.

შინაგან საქმეთა სამინისტრომ 20 ივნისის მოვლენებზე საქართველოს ყოფილი პრეზიდენტის, მიხეილ სააკაშვილის განცხადებასთან დაკავშირებით გამოძიება დაიწყო. მათი თქმით, სააკაშვილის რიტორიკა ხელისუფლების დამხობის მცდელობაზე მიუთითებს.

უწყება სააკაშვილს 12 იანვარს გაკეთებულ განცხადებას ედავება: "2019 წლის 20 ივნისს ბიძინა ივანიშვილის წკიპზე იყო. ცოტაც და ეს რეჟიმი დაემხობოდა. მაშინ, ჩემი აზრით, მომენტი გაშვებული იქნა".