ყოფილ ცოლზე ძალადობისთვის ბრალდებული სასულიერო პირს, ლაშა ჩიქოვანს საპატრიარქო მონასტერში გზავნის. ამის შესახებ ინფორმაცია On.ge-ს საპატრიარქოში დაუდასტურეს.

"სინანულისათვის მონასტერში ცხოვრება განეწესება. უახლოეს პერიოდში განისაზღვრება, თუ რომელ მონასტერში დაჰყოფს და რამდენ ხანს", — აცხადებენ საპატრიარქოში და დამატებით კითხვებზე პასუხის გაცემისგან თავს იკავებენ.

ყოფილი ცოლის მიმართ მუქარის საქმეზე სასულიერო პირს, ლაშა ჩიქოვანს გუშინ, 10 იანვარს აღკვეთის ღონისძიების სახით 3 000 ლარის ოდენობის გირაო შეეფარდა. ლაშა ჩიქოვანისთვის გირაოს შეფარდებას პროკურატურა ითხოვდა.

ხუთი შვილის დედა, ნინო გორგოშიძე თავის ყოფილ ქმარს, რომელიც სასულიერო პირია, ძალადობაში ადანაშაულებს, ხოლო სამართალდამცავებს — უმოქმედობაში. არაერთ ფეისბუქლაივში ქალი ამბობს, რომ მას სიცოცხლის მოსპობით ემუქრებიან, ყოფილ ქმარს კი მისი ყოფილი მამამთილი, ასევე, სასულიერო პირი აფარებს ხელს.

როგორც ნინო გორგოშიძე აცხადებდა, ქმრის წინააღმდეგ 10-ზე მეტი შემაკავებელი ორდერია გამოწერილი, თუმცა მუქარა არ შემწყდარა. ქალი ყვებოდა, რომ მისი ყოფილი ქმარი "ბეისბოლის ბიტით ტვინის გასxმით" და ჭრილობების მიყენებით ემუქრება.