New York Times ავრცელებს ვიდეოს და ირწმუნება, რომ ამ კადრებში ასახულია, როგორ ხვდება უკრაინულ თვითმფრინავს ირანული რაკეტა. ინფორმაცია ვიდეომასალის დართვით რამდენიმე წუთის წინ გავრცელდა.

როგორც გამოცემა წერს, ვიდეო გადაღებულია თეირანთან ახლოს, სადაც უკრაინულმა ავიალაინერმა ჩამოვარდნამდე სიგნალის მიწოდება შეწყვიტა. ვიდეოში ჩანს, რომ შეჯახების შემდეგ მცირე აფეთქება მოხდა, თუმცა თვითმფრინავი რამდენიმე წუთის განმავლობაში განაგრძობდა ფრენას და სავარაუდოდ, აეროპორტისკენ მიატრიალა, სანამ აფეთქდებოდა და სწრაფად ჩამოვარდებოდა.

დღესვე, 9 იანვარს საერთაშორისო მედიამ გაავრცელა ინფორმაცია, რომ ირანმა შეცდომით ჩამოაგდო უკრაინული თვითმფრინავი.

8 იანვარს ირანში უკრაინის საერთაშორისო ავიახაზების თვითმფრინავი ჩამოვარდა და ბორტზე მყოფი ყველა პირი, 168 მგზავრი და 9 ეკიპაჟის წევრი, გარდაიცვალა. დაღუპულთა შორის 7 ქვეყნის მოქალაქეები არიან. მათ შორის ირანის — 82, კანადის — 63, უკრაინის — 11, შვეიცარიის — 10, ავღანეთის — 4, გერმანიის — 3 და დიდი ბრიტანეთის — 3 მოქალაქე. უკრაინის 11 მოქალაქეს შორის 2 მგზავრი იყო, 9 კი ეკიპაჟს წევრი.

კომპანიის წარმომადგენლები აცხადებენ, რომ თვითმფრინავი აფრენიდან თითქმის 2 წუთში რადარებიდან გაქრა. მათივე თქმით, მომხდარის გამო გაურკვეველი დროით ირანში ფრენებს შეწყვეტენ.

კომპანიის ტექნიკური დირექტორის განცხადებით, ბოინგი 2016 წელს გამოშვებულია და ბოლო ტექნიკური შემოწმება 6 იანვარს გაიარა. მისი თქმით, შემოწმებისას პერსონალს არანაირი ტექნიკური ხარვეზი არ აღმოუჩენია და არც ეკიპაჟს უცნობებია რაიმე სახის პრობლემაზე. მისივე თქმით, ეს ბოინგი ერთ-ერთი საუკეთესო იყო მათ შორის, რაც კომპანიას გააჩნდა.

ირანი უარს ამბობს შავი ყუთი უკრაინას გადასცეს, თუმცა დათანხმდა იმას, რომ გამოძიებაში უკრაინელმა ექსპერტებიც ჩაერთონ.