პრემიერ-მინისტრი, გიორგი გახარია ამბობს, რომ ზამთრის კურორტებზე წყალმომარაგების პრობლემა არ უნდა მომხდარიყო და ეს პრობლემა მთავრობას უნდა მოეგვარებინა. ამის შესახებ მან დღეს, 9 იანვარს გამართულ მთავრობის სხდომაზე განაცხადა. მისივე თქმით, უახლოესი საათების განმავლობაში ზამთრის კურორტებზე წყალმომარაგების პრობლემა საბოლოოდ მოგვარდება.

"წლის დასაწყისში ჩვენ, სამწუხაროდ, გვქონდა გარკვეული გართულებები ჩვენს ზამთრის კურორტებზე. მოგეხსენებათ, რომ იყო გარკვეული პრობლემები წყალმომარაგების თვალსაზრისით, როგოც გუდაურში, ასევე ბაკურიანში. აქ, ერთმნიშვნელოვნად, უნდა ვთქვათ, რომ ჩვენ ეს პრობლემა უნდა მოგვეგვარებინა, ეს არ უნდა მომხდარიყო. მიუხედავად იმისა, რომ ჩვენ დღეს ზუსტად ვიცით, რომ გამომწვევი მიზეზები იყო როგორც ობიექტური, ასევე სუბიექტური ფაქტორები. თუმცა ის ძალისხმევა, რომელსაც ბოლო წლების განმავლობაში საქართველოს მთავრობა ახორციელებს ქვეყანაში ტურისტების მოზიდვის თვალსაზრისით, არის უაღრესად გასაფრთხილებელი. სწორედ ამიტომ, გვმართებდა უფრო მეტი პრევენციული მუშაობა", — განაცხადა გახარიამ.

ბაკურიანსა და გუდაურში ერთი კვირაზე მეტია წყლის მიწოდების პრობლემაა. გუდაურთან დაკავშირებით გაერთიანებული წყალმომარაგების კომპანია აცხადებდა, რომ პრობლემა გუდაურში მშრალი კლიმატური პირობების გამო წყლის მარაგის შემცირებამ და სეზონზე გაზრდილი მოხმარების შედეგად წნევის ვარდნამ გამოიწვია.

ტურიზმი საქართველოს ეკონომიკის შემოსავლის ერთ-ერთი ყველაზე დიდი წყაროა. მეტწილად, სწორედ მასზეა დამოკიდებული ეროვნული ვალუტის სიმყარე და ქვეყნის განვითარება.