სულ რამდენიმე საათში კინოსამყაროში ერთ-ერთი ყველაზე მნიშვნელოვანი დაჯილდოება — ოქროს გლობუსი 77-ედ ჩატარდება და უცხოური პრესის ასოციაცია გასული წლის გამორჩეულ ფილმებსა და სერიალებს შორის გამარჯვებულებს დაასახელებს.

წლევანდელი დაჯილდოება განსაკუთრებით დაძაბული და საინტერესო იქნება, რადგან 2020 წლის ნომინანტებს შორის ერთმანეთზე უფრო ძლიერი კინოსურათები, სატელევიზიო შოუები, მსახიობები თუ რეჟისორები არიან წარმოდგენილი.

მათ შორის აღსანიშნავია, რომ წელს ფილმებს შორის ყველაზე მეტი ნომინაცია ნოა ბაუმბახის Marriage Story-მ და კვენტინ ტარანტინოს Once Upon a Time… in Hollywood-მა, ხოლო სერიალებს შორის HBO-ს მინისერიალმა Chernobyl და ნეტფლიქსის ორმა სატელევიზიო შოუმ — The Crown და Unbelievable მიიღეს.

დაჯილდოების ცერემონია ტრადიციულად ლოს-ანჯელესში, სასტუმრო ბევერლი ჰილტონში გაიმართება და მისი წლევანდელი წამყვანი ცნობილი ინგლისელი კომიკოსი, მსახიობი და მწერალი, რიკი ჯერვეისი იქნება, რომელიც ოქროს გლობუსის დაჯილდოებას მეხუთედ უმასპინძლებს.

რიკი ჯერვეისი 2011 წლის ოქროს გლობუსის დაჯილდოებაზე.

ფოტო: REUTERS

რა თქმა უნდა, დაჯილდოებაზე კინოსამყაროს თითქმის ყველა ვარსკვლავს ერთ დარბაზში ვიხილავთ — ისინი ჯერ წითელ ხალიჩაზე გაიბრწყინებენ , მოგვიანებით კი ზოგიერთ მათგანს, როგორც გამარჯვებულს, სცენაზეც ვიხილავთ ჯილდოთი ხელში.

ამასთან ერთად წამყვან რიკი ჯერვეისს ნომინანტების დასახელებასა და მათ შორის გამარჯვებულების გამოცხადებაში ისეთი ცნობილი მსახიობები დაეხმარებიან, როგორებიც არიან მარგო რობი, რემი მალეკი, ბრედ პიტი, სკარლეტ იოჰანსონი, ლეონარდო დიკაპრიო და სხვა.

ფოტო: Getty

ოქროს გლობუსის დაჯილდოების ცერემონია თბილისის დროით 6 იანვარს, დილის 5 საათზე დაიწყება. პირდაპირ ეთერს შეგიძლიათ თვალი ოქროს გლობუსის ფეისბუქ გვერდზე მიადევნოთ და ამავდროულად On.ge-ს ფეისბუქ გვერდიც არ გამოგრჩეთ მხედველობიდან, სადაც ყველა მნიშვნელოვან ინფორმაციას უმოკლეს დროში მოგაწოდებთ.

ასევე იხილეთ: