ქართული ოცნების გენერალური მდივანი და თბილისის მერი, კახა კალაძე ამბობს, რომ მას "ბოტების პიაირი" არ სჭირდება. მისივე თქმით, ეს სჭირდება ძალას, რომელიც ქვეყანას ცხრა წლის განმავლობაში მართავდა.

"არანაირი ტროლი, არანაირი ბოტი არ ვიცი და არასდროს მქონია შეხება. მე არ მჭირდება ბოტების პიარი, თქვენ შეგიძლიათ ჩემთან ერთად გამოიაროთ ქუჩაში და თქვენ თვითონ დარწმუნდებით, კახა კალაძეს სჭირდება თუ არა ბოტები და ტროლები. ჩვენ დღეს უნდა ვიფიქროთ მომავალზე, უნდა ვიფიქროთ უკეთეს საქართველოზე. უნდა ვიფიქროთ იმაზე, რომ ეკონომიკურად რაც შეიძლება სწრაფად გაიზარდოს, ორნიშნა ციფრამდე ავიყვანოთ ეკონომიკის ზრდა, რათა კეთილდღეობა იგრძნოს ჩვენი ქვეყნის თითოეულმა მოქალაქემ", — განაცხადა კახა კალაძემ.

20 დეკემბერს სოციალური მედიის გიგანტმა ფეისბუქმა 396 გვერდი და ჯგუფი და ათეულობით ყალბი ანგარიში წაშალა. ამის მიზეზად დეზინფორმაციული და პროპაგანდისტული ინფორმაციების გავრცელება დასახელდა, რომლის კვალმა ფეისბუქის მკვლევარები მმართველ პარტიამდე, ქართულ ოცნებამდე მიიყვანა.