ცოტნე გამსახურდიას მკვლელობის მცდელობისა და დანაშაულის შეუტყობინებლობის ბრალდებით დაკავებულ ოთხ პირს: ტატო ღარიბაშვილს, გიორგი სოლოღაშვილს, პეტრე ყუფარაძესა და კახა ჩხეტიანს აღკვეთის ღონისძიების სახედ პატიმრობა შეუფარდეს.

ამავე საქმეზე შეუტყობინებლობის ბრალდებით დაკავებული მეხუთე პირი, თორნიკე ქვათაძე მოსამარლემ აღკვეთის ღონისძიების გარეშე დატოვა. ამის შესახებ გადაწყვეტილება მოსამართლე ნატო ხუჯაძემ დღეს, 22 დეკემბრის სხდომაზე მიიღო.

ადვოკატ რომან ნადირაძის განმარტებით, მოსამართლეს ჰქონდა საფუძველი, თორნიკე ქვათაძე დაეტოვებინა აღკვეთი ღონისძიების გარეშე. კერძოდ, ადვოკატის თქმით, დაკავებულია მისი ძმა, გიორგი სოლოღაშვილი და უფლება ჰქონდა ახლო ნათესავის, ოჯახის წევრის წინააღმდეგ არ მიეცა ჩვენება.

ცოტნე გამსახურდიას დამამძიმებელ გარემოებაში ჯგუფურად ჩადენილი განზრახ მკვლელობის მცდელობის ბრალდებით დააკავეს ორი პირი, ხოლო დანაშაულის შეუტყობინებლობის ბრალდებით სამი პირი.

საქართველოს პირველი პრეზიდენტის, ზვიად გამსახურდიას შვილი, ცოტნე გამსახურდია 19 დეკემბრის საღამოს დაჭრეს. შემთხვევა თბილისში, ვერაზე მოხდა. ინციდენტის შემდეგ ცოტნე გამსახურდიას გულმკერდის არესა და თავის ტვინზე ორი ოპერაცია ჩაუტარდა. ამჟამად მისი მდგომარეობა სტაბილურია, მაგრამ მძიმე.