დიდი ოდენობით ქრთამის აღებისთვის მსჯავრდებული ზუგდიდის ყოფილი მერი, ლაშა გოგია რესტორანში იყო. ამის შესახებ ინფორმაცია ადგილობრივმა მედიამ odishinews-მა გამოაქვეყნა. გამოცემა წერს, რომ პატიმრის რესტორანში ყოფნის ამსახველი ფოტო ყოფილი მერის ცოლმა, ნანა თოდუამ ფეისბუქზე დადო.

პენიტენციურ სამსახურში On.ge-ს განუმარტეს, რომ პატიმარ ლაშა გოგიას სასჯელის ვადად ერთ წელზე ნაკლები აქვს დარჩენილი, იგი არის პატიმრის გათავისუფლებისათვის მომზადების ნაწილში და უქმეებზე ციხის დატოვება შეუძლია. პენიტენციურში, ასევე, ამბობენ, რომ მსგავსი უფლებით სარგებლობს ლაშა გოგიასთან ერთად დაკავებული მისივე ყოფილი მოადგილე, გია გულორდავაც.

უწყების ცნობით, #16 ციხე არის დაბალი რისკის დაწესებულება, სადაც კანონით ფუნქციონირებს პატიმრების გათავისუფლებისათვის მომზადების ნაწილი:

"პატიმრობის კოდექსის 716 მუხლის თანახმად, გენერალური დირექტორის გადაწყვეტილებით დასვენებისა და უქმე დღეებში შესაძლებელია გათავისუფლებისათვის მომზადების ნაწილში განთავსებულ მსჯავრდებულს მიეცეს პენიტენციური დაწესებულების დატოვების უფლება. პატიმრობის კოდექსში შესაბამისი ცვლილებები 2017 წლის ივნისში შევიდა და ამ ცვლილების ამოქმედების ვადად 2018 წლის პირველი იანვარი განისაზღვრა. ნორმის ამოქმედებიდან დღეის ჩათვლით სულ 59-მა მსჯავრდებულმა ისარგებლა უქმე დღეებში პენიტენციური დაწესებულების დატოვების უფლებით".

25 ივნისს ზუგდიდის ყოფილ მერს ლაშა გოგიას კორუფციის საქმეზე ორი წლით თავისუფლების აღკვეთა და ოთხი წლით პირობითი მსჯავრი მიუსაჯეს. თბილისის საქალაქო სასამართლომ იგივე გადაწყვეტილება მიიღო ვიცე-მერის მოადგილის გია გულორდავას მიმართ. მსჯავრდებულები, 2018 წლის 1 ნოემბერს დააკავეს, მათ ბრალი წარდგენილი ჰქონდათ ჯგუფურად, განსაკუთრებით დიდი ოდენობით ქრთამის აღების ფაქტზე.

ზუგდიდის ყოფილი მერი და მისი მოადგილე, ქრთამის აღების ბრალდებას არ აღიარებდნდენ. სახელმწიფო უსაფრთხოების სამსახურში განაცხადეს, რომ 2018 წლის პირველ ნახევარში, ლაშა გოგიამ და გია გულორდავამ ქალაქ ზუგდიდში მდებარე გულუას ბაღისა და რკინიგზის სადგურის მიმდებარე ტერიტორიების იჯარით გასაცემ აუქციონზე გატანის სანაცვლოდ მოქალაქეს ქრთამის სახით მოსთხოვეს და გამოართვეს განსაკუთრებით დიდი ოდენობით თანხა — 21 500 აშშ დოლარი.

ლაშა გოგიამ თანამდებობა 12 სექტემბერს, მიზეზის განმარტების გარეშე დატოვეს. გადადგომიდან ექვსი დღის შემდეგ ბრიფინგი გამართა, სადაც განაცხადა, რომ ის "პროვოკაციის მსხვერპლია და თავის უდანაშაულობას დაამტკიცებს".