ოკუპირებულ ცხინვალში უკანონოდ დაკავებული ვაჟა გაფრინდაშვილის ოჯახი პრემიერ-მინისტრ გიორგი გახარიას შეხვდა. როგორც შეხვედრის დასრულების შემდეგ გაფრინდაშვილის შვილმა მედიას უთხრა, პრემიერის გარდა ისინი პრემიერის მრჩეველ ირაკლი ჩიქოვანსა და რუსეთის საკითხებში პრემიერის სპეციალურ წარმომადგენელს, ზურაბ აბაშიძეს ესაუბრნენ.

"შევხვდით და ვისაუბრეთ სამომავლო გეგმებთან დაკავშირებით. მათი თქმით, კიდევ უფრო აქამდე აქტიურად არიან ჩართული საერთაშორისო ორგანიზაციები და კიდევ უფრო გააძლიერებენ ბერკეტებს, რადგან ჩვენი ერთადერთი ბერკეტი არის საერთაშორისო ზეწოლა", — განაცხადა გაფრინდაშვილის შვილმა.

მისივე თქმით, კონკრეტულ სამომავლო ნაბიჯებთან დაკავშირებით სჯობს, რომ მთავრობის ადმინისტრაციამ ისაუბროს.

საოკუპაციო რეჟიმმა ექიმ ვაჟა გაფრინდაშვილს 1 წლითა და 9 თვით უკანონო პატიმრობა მიუსაჯა. დე ფაქტო სასამართლომ ეს გადაწყვეტილება იმის გამო მიიღო, რომ გაფრინდაშვილი ე.წ. საზღვრის კვეთას არ აღიარებს და აცხადებს, რომ საქართველოს ტერიტორიაზე იმყოფება.

მისთვის უკანონო პატიმრობის მისჯის შემდეგ ოჯახმა გიორგი გახარიასთან პირადად შეხვედრა კიდევ ერთხელ ითხოვა.

ექიმი საოკუპაციო ძალებმა 9 ნოემბერს კასპის რაიონში დააკავეს. ის ოკუპირებულ ტერიტორიაზე ავადმყოფი ქალის დასახმარებლად გადავიდა, რომელიც თბილისში სამკურნალოდ ვერ ჩამოდიოდა. ოკუპირებულ ახალგორში მცხოვრები 60 წლის ქალი ჭაში ჩავარდა და დაზიანებები მიიღო, თუმცა თბილისში ვერ გადაიყვანეს, რადგან საოკუპაციო რეჟიმს ე.წ. გამშვები პუნქტი ჩაკეტილი ჰქონდა.

გაფრინდაშვილის გათავისუფლების მოთხოვნით ოჯახმა, ოპოზიციამ და მთავრობამ სხვადასხვა საერთაშორისო პარტნიორებს მიმართა, თუმცა უშედეგოდ. ხელისუფლების წარმომადგენლები აცხადებდნენ, რომ ყველაფერს აკეთებდნენ გაფრინდაშვილის დროულად დასაბრუნებლად.