ერთიანი ნაციონალური მოძრაობის ზუგდიდის მაჟორიტარული დეპუტატობის კანდიდატმა, საქართველოს ყოფილმა პირველმა ლედიმ, სანდრა რულოვსმა გადაწყვიტა, რომ საპარლამენტო არჩევნების მეორე ტურში მონაწილეობა არ მიიღოს. ამის შესახებ მან ექსკლუზიურ ინტერვიუში განუცხადა ოდიში ნიუსს.

სანდრა რულოვსის თქმით, ის შეურაცხყოფად მიიჩნევს მეორე ტურში ბრძოლას: "ყველამ იცის, რომ მე პირველ ტურში გავედი, ამიტომ შეურაცხყოფად ვთვლი მეორე ტურში შემოსვლას ამ უსამართლო ე. წ. დემოკრატიული არჩევნების ფონზე.

მე ვთვლი, რომ არ უნდა მივიღო მონაწილეობა მეორე ტურში. ჯერ ერთი, მთელ ზუგდიდში ძალიან ცუდი - ქურდული, კრიმინალური და წნეხის პირობებია შექმნილი და არ მინდა, ამ ხალხს კიდევ პრობლემები ჰქონდეს, შეურაცხყოფა მიაყენონ, დასცინონ.
მე ვიცი, რომ გამარჯვებული ვარ და, აქედან გამომდინარე, ზუგდიდის მუნიციპალიტეტის მცხოვრებლებს პარლამენტიდან ან თუნდაც სხვა ადგილიდან დავუდგები გვერდში - ეს ჩემი ვალდებულებაა".

სანდრა რულოვსის თქმით, არჩევნების გაყალბებისა და ამომრჩეველთა დაშინების გზით მას ზუგდიდში გამარჯვება მოპარეს როგორც 8 ოქტომბერს, ისე 22 ოქტომბრის განმეორებით კენჭისყრაზე. ის დარწმუნებულია, რომ მისი გამარჯვება ზუგდიდში იქნებოდა "ივანიშვილის პირადი მარცხი", სწორედ ამის გამო ყველაფერი გააკეთეს, რომ ეს არ მომხდარიყო.

სანდრა რულოვსმა 22 ოქტომბრის განმეორებით კენჭისყრაზე, ზუგდიდის რაიონის სამ უბანზე, ჯამში, 438 ხმა (30,50%) მიიღო, ქართული ოცნების კანდიდატმა, ედიშერ თოლორაიამ კი – 981 ხმა (68,1%).

მთლიანობაში, ზუგდიდის 66-ე მაჟორიტარულ ოლქში სანდრა რულოვსმა მიიღო 45,71 პროცენტი, ედიშერ თოლორაიამ კი – 45,37%. სწორედ ამიტომ, მეორე ტურში ისინი უნდა დაპირისპირებოდნენ ერთმანეთს.

8 ოქტომბრის არჩევნების შემდეგ მეორე ტურში მონაწილეობის წინააღმდეგი იყო სანდრა რულოვსის ქმარი, საქართველოს ყოფილი პრეზიდენტი მიხეილ სააკაშვილი, თუმცა, ნაციონალური მოძრაობის პოლიტსაბჭოზე უმრავლესობით მიიღეს გადაწყვეტილება, რომ მეორე ტურში ბრძოლა გაეგრძელებინათ და პარლამენტშიც შესულიყვნენ.