საქართველოს ძიუდოს ფედერაცია მალავს ჩაუტარდა თუ არა სამედიცინო შემოწმება ლაშა ბექაურს ჩინეთში ჩემპიონატში მონაწილეობამდე. ბექაურმა ქვეყნის დატოვებამდე რამდენიმე საათით ადრე პოლიციელები სიტრყვიერ და ფიზიკურ შეურაცხყოფაში დაადანაშაულა.

ძიუდოს ფედერაციის პრეზიდენტმა, გიორგი ათაბეგაშვილმა On.ge-სთან საუბრისას, თავდაპირველად, თქვა, რომ ინფორმაცია არ ჰქონდა ჩაუტარდა თუ არა ჩემპიონს ასპარეზობამდე კვლევები. დამაზუსტებელ კითხვაზე, რატო არ გადაამოწმეს ბექაურისგან ბრალდების გაჟღერების შემდეგ მისი ჯანმრთელობის მდგომარეობა, ათაბეგაშვილი ასე პასუხობს:

"გამოძიების დასრულებამდე კომენტარს არ გავაკეთებ... გაგეცით პასუხი, არ ვაპირებ პასუხის გაცემას".

თავად ბექაურმა On.ge-ს უთხრა, რომ ამ საკითხზე საუბარს არ აპირებს. მან არც იმ კითხვას უპასუხა, რატომ არ დათანხმდა სახელმწიფო ინსპექტორის აპარატს ექსპერტიზის ჩატარებაზე.

ლაშა ბექაური, რომელიც ქართულ პოლიციას ძალადობაში ადანაშაულებდა, ჩინეთის მასტერსის გამარჯვებული 14 დეკემბერს გახდა. მან 90-გილოგრამიან წონით კატეგორიაში ესპანეთის წარმომადგენელი, ასევე ქართველი სპორტსმენი ნიკოლოზ შერაზადიშვილი დაამარცხა.

ლაშა ბექაურმა სამართალდამცავები ძალადობაში რამდენიმე დღის წინ დაადანაშაულა და Facebook-ზე ვრცელი პოსტი დაწერა. თუმცა პოსტი ბრალდების გაჟღერებიდან ორ საათში აღარ იძებნებოდა.

"გაუგებრობა იყო, ნუღარ მკითხავთ ნურაფერს... არაფერი, გაუგებრობა იყო, ნუღარ მისვამთ კითხვებს... არაფერი აღარ მიწერია, წაშლილია ყველაფერი... მეც კარგად ვარ, არაფერი არ მომხდარა", — უთხრა 19 წლის სპორტსმენმა TV პირველის ჟურნალისტს და არც ერთ დასმულ კითხვას არ უპასუხა.