თბილისის მერისა და ქართული ოცნების გენერალური მდივნის კახა კალაძის თქმით, უზენაეს სასამართლოში უვადოდ დანიშნულ მოსამართლეებს შორის, რამდენიმე "ოდიოზური ფიგურაა".

კალაძე აღნიშნავს, რომ მისთვის მნიშვნელოვანია სასამართლოსადმი საზოგადოების დამოკიდებულება.

"ჩვენთვის მთავარი არის ის, რომ რეპუტაციულად საზოგადეობას ჰქონდეს განსხვავებული მიდგომები და დამოკიდებულება სასამართლოს მიმართ... მათგან, ვინც იქნა დამტკიცებული, არის რამდენიმე ოდიოზური ფიგურა, ეს ჩემი მოსაზრებაა", — განუცხადა კალაძემ ჟურნალისტებს.

თბილისის მერის შეფასებით, წარსულში ერთი ადამიანი, მიხეილ სააკაშვილი და "მისი დაჯგუფება" იყო სასამართლოც, პარლამენტიც, პროკურატურაც და შინაგან საქმეთა სამინისტროც.

12 დეკემბრის მოვლენები მოკლედ

12 დეკემბერს სამოქალაქო მოძრაობის აქტივისტებმა და პოლიტიკური პარტიის წარმომადგენლებმა პარლამენტის შესასვლელების პიკეტირება სცადეს, თუმცა დეპუტატები საკანონმდებლო ორგანოში მაინც შევიდნენ. აქციაზე პოლიციამ ჯამში 16 პირი დააკავა.

პარლამენტის უპარტიო დეპუტატი, ეკა ბესელია ამბობდა, რომ მოსამართლეთა არასასესიო კვირაში არჩევა პარლამენტის რეგლამენტს ეწინააღმდეგებოდა. ის რამდენიმე წუთის განმავლობაში კომიტეტის თავმჯდომარეს არ აძლევდა საშუალებას კანდიდატურები განეხილათ.

პროცესის ჩასაშლელად კენჭისყრის დაწყებამდე რამდენიმე წუთით ადრე პლენარულ სხდომათა დარბაზში გაურკვეველი ნივთიერება გაუშვეს, რამდენიმე ადამიანი ცუდად გახდა. ამ მიზეზით სხდომათა დარბაზი დაატოვებინეს დეპუტატებს და კენჭისყრამ რამდენიმე საათით გადაიწია. საქმეზე გამოძიება შსს-მ სისხლის სამართლის კოდექსის 117-ე მუხლით დაიწყო. ამ მუხლით ჯანმრთელობის განზრახ მძიმე დაზიანება მინიმუმ 3-წლიანი პატიმრობით ისჯება. ქართულმა ოცნების ერთ-ერთმა დეპუტატმა მომხდარი ტერორისტულ აქტად, დანარჩენებმა კი ქიმიურ თავდასხმად შეაფასეს. მომხდარზე პასუხისმგებლობა #სირცხვილიამ აიღო.

საბოლოოდ, კენჭისყრა მაინც ჩატარდა და ქართულმა ოცნებამ 14 მოსამართლე უზენაეს სასამართლოში უვადოდ დანიშნა.