მას შემდეგ, რაც ეკა ბესელიას მიკროფონი გაუთიშეს, იგი ადგა და იურიდიულ საკითხთა კომიტეტის თავმჯდომარის, ანრი იხანაშვილის გვერდით დაჯდა. ამ დროს კი ქართული ოცნების მაჟორიტარმა დეპუტატმა, ირაკლი (დაჩი) ბერაიამ ოხანაშვილს ერთგვარი "გაფრთხილება" მისცა:

"ირტყმეინება მაგი, ირტყმეინება".

დღეს, 12 დეკემბერს, იურიდიულ საკითხთა კომიტეტმა უვადოდ დასამტკიცებელი 14 მოსამართლის სიას რეკომენდაცია გაუწია. სიას კომიტეტის 8 წევრის მხარდაჭერა ჰქონდა. ახლა უკვე პლენარულ სხდომაზე კენჭისყრაა დარჩენილი. ამ სიის დამტკიცებას ეწინააღმდეგება საპარლამენტო ოპოზიცია, დამოუკიდებელი დეპუტატები და იუსტიციის უმაღლესი საბჭოს არამოსამართლე წევრები.

სხდომის დარბაზიდან მანდატურის სამსახურმა ჟურნალისტები ძალის გამოყენებით გაიყვანა და მათ მოვალეობის შესრულების შესაძლებლობა არ ეძლეოდათ.

სიისთვის კენჭისყრას ეწინააღმდეგებოდნენ საპარლამენტო ოპოზიცია და დამოუკიდებელი დეპუტატები. მათი თქმით პროცესი არალეგიტიმურია. ეკა ბესელია ანრი ოხანაშვილს უზენაესის მოსამართლეების საკითხის განხილვის უფლებას არ აძლევდა. ბესელია ამბობს, რომ არასასესიო კვირაში მოსამართლეთა კანდიდატების საკითხის განხილვა, პარლამენტის რეგლამენტის დარღვევაა.