22 ოქტომბრიდან 25 ოქტომბრის ჩათვლით დოკუმენტური კინოს მოყვარულებს CinéDOC–Tbilisi-ს ფარგლებში ხუთი პოლონური ფილმის ნახვის საშუალება ექნებათ, რომელთაც ფესტივალზე ადამ მიცკევიჩის ინსტიტუტის წამყვანი ბრენდი, Culture Pl-ი წარმოადგენს.

ფესტივალის ფარგლებში ჩატარდება ღია დისკუსიები, პრეზენტაციები და ვორქშოპები, შეხვედრები ევროპის სხვადასხვა ქვეყნებიდან მოწვეულ რეჟისორებთან და ადგილობრივი კინოინდუსტრიის წარმომადგენლებთან.

პროექტის მნიშვნელოვან ნაწილს წარმოადგენს Civil Pitch, რომლის მიზანია არასამთავრობო ორგანიზაციებისა და ქართველი კინოპროფესიონალების აქტიური საკომუნიკაციო სივრცის შექმნა. ორმხრივი ინტერესის ფონზე, Civil Pitch-ის ფარგლებში გაიმართება პრეზენტაციები და დისკუსიები დოკუმენტური ფილმების იდეების შესახებ, მის სამომავლო პერსპექტივაზე და საჭირო მხარდაჭერაზე. საერთაშორისო ექსპერტი, Marta Szuchnicka, WATCH DOCS Festival-იდან სწორედ ამ ნაწილის მენტორი იქნება.

CASA BLANCA

76 წლის ნელსა და მისი 37 წლის ვაჟი, ვლადიმერი, რომელსაც დაუნის სინდრომი აქვს, საერთო საცხოვრებლის ერთ პატარა ოთახში ცხოვრობენ. მათ ერთმანეთის გარდა არავინ ჰყავთ. მათი ურთიერთობა კონფლიქტებით აღსავსეა, ნელსა შვილის გაკონტროლებას ცდილობს, მაშინ როცა ვლადიმერს დედასთან დროის გატარებას მეთევზეებთან ერთად დალევა და გართობა ურჩევნია. ნელსა ყოველდღე კასა ბლანკას ქუჩებში დაეხეტება ერთადერთი შვილის საძებნელად. ერთ დღესაც, ნელსა ავად ხდება.

ფილმის ჩვენება:

23 ოქტომბერი / კვირა / ამირანი / 14:00 / დარბაზი N3

25 ოქტომბერი / სამშაბათი / 16:00 - ფრონტლაინ კლუბი

I AM KUBA

ოჯახური ბიზნესის გაკოტრების შემდეგ, 12 წლის კუბასა და 8 წლის მიკოლაჟის მშობლები იძულებულები ხდებიან პოლონეთი დატოვონ და სამუშაო საზღვარგარეთ ეძებონ. I AM KUBA არის ფილმი კუბაზე, რომელიც ვალდებულია უმცროს ძმას მოუაროს, სანამ მშობლები წასულები არიან. დრო გადის, კუბა თინეიჯერი ხდება და უარს ამბობს ამ პასუხისმგებლობაზე. ოჯახი იძულებულია მნიშვნელოვანი გადაწყვეტილება მიიღოს. კუბას ამბავი თანამედროვე ევროპაზეა. მხოლოდ პოლონეთში 100 ათასზე მეტი ბავშვი რჩება მშობლების გარეშე, რადგან მშობლები იძულებული არიან სამსახური საზღვარგარეთ ეძებონ. I AM KUBA არის ფილმი ბავშვებზე, რომლებიც იზრდებიან „ევრო-ობლებად“.

ფილმის ჩვენება:

22 ოქტომბერი / შაბათი / ამირანი / 14:30 / დარბაზი N3

THE QUEEN OF SILENCE

10 წლის დენისა პოლონეთში არსებულ ბოშათა ბანაკში მცხოვრები უკანონო მოქალაქეა, რომელიც ვერ საუბრობს, რადგან სმენის პრობლემა აქვს. დენისა თავის სამყაროში ცხოვრობს, რომელიც სავსეა რიტმებით და ცეკვებით, ის ბაძავს ბოლივუდის გლამურულ ქალებს, რომლებიც ნაგავში ნაპოვნ DVD-ზე ნახა. ცეკვის დროს დენისას შეუძლია იყოს ის, ვინც უნდა, დედოფალიც კი და გამოხატოს ის, რისი თქმაც არ შეუძლია - მხიარულება, სევდა და შიში.

ფილმის ჩევენება:

25 ოქტომბერი / სამშაბათი / რუსთაველი / დარბაზი N3

THE END OF THE WORLD

ეს ინტიმური, კრეატიული დოკუმენტური ფილმი ერთ ღამეში მომხდარ რამდენიმე ამბავს აერთიანებს. დიდ ქალაქში ადამიანები ერთი საჭიროების გარშემო არიან გაერთიანებულები - აწუხებთ მარტოობა და სურთ ვინმესთან საუბარი. ზოგი მათგანი სასწრაფოში რეკავს, მაშინაც კი, როცა ამის საჭიროება არ არსებობს, ზოგიც - რადიოში. ამჯერად რადიოში საუბარია სამყაროს დასასრულზე, რომელიც მაიას კალენდრის მიხედვითაა ნაწინასწარმეტყველები. მსმენელები საუბრობენ ტრაგიკულ და მტკივნეულ თემებზე, ხანდახან სახალისო ისტორიებს ყვებიან. რადიო კრავს ფილმის ელემენტებს, როგორც სტრუქტურულად, ისე მნიშვნელობით: ეს არის ყველაზე მნიშვნელოვანი კითხვების წყარო.
ფილმის ჩვენებას რეჟისორიც დაესწრება.

ფილმის ჩვენება:

24 ოქტომბერი / ორშაბათი / რუსთაველი / 20:00 - დარბაზი N3

25 ოქტომბერი / სამშაბათი / ამირანი / 16:00 / დარბაზი N3

BROTHERS

80-წლიანი განშორების შემდეგ ორი ძმა ყაზახეთიდან პოლონეთში ბრუნდება. მათი მიზანი ახალ მსოფლიოში თავის დამკვიდრებაა. ძმები წინააღმდეგობებს აწყდებიან განსხვავებული ხასიათის გამო. ერთი ძმა მხატვარი და მეოცნებეა, მეორე კი - პრაგმატული ინჟინერი. ისინი ისევე განსხვავდებიან, როგორც მელანი და წყალი და ისეთივე განუყრელები არიან, როგორც ყვავილი და მისივე ღერო. მათ სურთ ცხოვრება თავიდან დაიწყონ, რასაც ართულებს დრამატული მოვლენები, რაც მათ ცხოვრებაში ვითარდებოდა: ხანძარი, რომელმაც რამდენიმე ათასი ნახატი შეიწირა და ის ფაქტი, რომ ერთ-ერთმა ძმამ მეორე მოხუცებულთა თავშესაფარში ჩააბარა. დროსთან შეჯიბრი იწყება, ნუთუ ძმები საკმარისად სწრაფები იქნებიან?!

ფილმის ჩვენება:

22 ოქტომბერი / შაბათი / რუსთაველი / 20:00 / დარბაზი N4

24 ოქტომბერი / ორშაბათი / ამირანი / 20:00 / დარბაზი N3

CinéDOC–Tbilisi – პირველი საერთაშორისო დოკუმენტური კინოფესტივალი კავკასიაში, რომელიც წელს უკვე მეოთხედ 21-25 ოქტომბერს ტარდება, ქალაქ თბილისში.ფესტივალის კინოჩვენებას უმასპინძლებენ: კინოთეატრები „ამირანი“ და „რუსთაველი“, Frontline Club და გოეთეს ინსტიტუტი.