მოძრაობა #სირცხვილია ადამიანის უფლებების დაცვაში შეტანილი წვლილისთვის დააჯილდოვეს. გადაწყვეტილება 15-მა უნივერსიტეტმა მიიღო.

დაჯილდოება ადამიანის უფლებათა საუნივერსიტეტო კვირეულის ფარგლებში შედგა. ადამიანის უფლებების საუნივერსიტეტო კვირეულის ორგანიზატორებს შორის არიან: თბილისის თავისუფალი უნივერსიტეტი, საქართველოს საზოგადოებრივ საქმეთა ინსტიტუტი (GIPA), შავი ზღვის საერთაშორისო უნივერსიტეტი და სხვები.

ფოტო: სალომე ბარკერი

ადამიანის უფლებების სამართლის საუნივერსიტეტო კვირეულის მხარდამჭერები არიან: ამერიკის შეერთებული შტატების საერთაშორისო განვითარების სააგენტოს (USAID), ფონდი ღია საზოგადოება საქართველო, სეუ და სხვები.

ადამიანის უფლებების სამართლის საუნივერსიტეტო კვირეული ყოველწლიურად დეკემბრის თვეში, თბილისის თავისუფალი უნივერსიტეტის ორგანიზებით, ამერიკის შეერთებული შტატების საერთაშორისო განვითარების სააგენტოს მიერ დაფინანსებული პროგრამის „კანონის უზენაესობის მხარდაჭერა საქართველოში" (USAID-PROLoG) და ღია საზოგადოების ფონდის (OSGF) მხარდაჭერით იმართება. მისი მიზანი სტუდენტებსა და ახალგაზრდებში ადამიანის უფლებების პრობლემური საკითხების შესახებ ცოდნის გავრცელება და უნივერსიტეტების თანამშრომლობის გზით ადამიანის უფლებების სამართლის შესახებ იდეათა და მოსაზრებათა აქტიური ურთიერთგაცვლაა.

მოძრაობა #სირცხვილია 20 ივნისის მოვლენების შემდეგ შეიქმნა, როდესაც ქვეყანაში რუსი კომუნისტი დეპუტატი, სერგეი გავრილოვი ჩამოიყვანეს და პარლამენტის სპიკერის სკამში ჩაჯდა.