სანამ მთელი დასავლური სამყარო ნაძვის ხის მორთვითა და ქუჩების განათებითაა დაკავებული, ბენქსი ცდილობს, ეს მომენტი მნიშვნელოვან საკითხზე ყურადღების გასამახვილებლად გამოიყენოს.

ბენქსის ახალი ნამუშევარი ბირმინგემში გამოჩნდა და მასზე ორი ირემია ასახული. ხის გრძელი სკამი კი ნახატის ბუნებრივი კომპონენტია.

ინსტაგრამზე გამოქვეყნებულ ვიდეოში ჩანს თეთრწვერიანი უსახლკარო კაცი, რომელიც ბოთლიდან სვამს და სკამზე წვება, გარშემო კი გამვლელები ირევიან.

"ღმერთმა დალოცოს ბირმინგემი. იმ 20 წუთში, სანამ ამ ვიდეოს ვიღებდით, კაცს გამვლელებმა მისცეს ცხელი სასმელი, ორი შოკოლადი და სანთებელა - ყოველგვარი თხოვნის გარეშე", - ნათქვამია პოსტის აღწერაში.

დიდ ბრიტანეთში უსახლკარობა მოუგვარებელ პრობლემად რჩება, ბირმინგემში ყოველწლიურად 18 უსახლკარო ადამიანი კვდება.