ერთიანი ნაციონალური მოძრაობის ვაკის მაჟორიტარი დეპუტატობის კანდიდატი, ელენე ხოშტარია ხვალინდელ განმეორებით არჩევნებს ეხმაურება და ამბობს, რომ იმ უბნებზე, სადაც ხვალ არჩევნები უნდა ჩატარდეს, საარჩევნო პროცესი იმიტომ ჩაიშალა, რომ ენმ-ს იქ ძლიერი პოზიცია ჰქონდა:

"ამომრჩეველს მოვუწოდებთ, მშვიდად და მტკიცედ მივიდნენ უბნებზე და თავისი ნება გამოხატონ, იმისათვის, რომ გამარჯვება დავიცვათ, რომელიც ჩვენი ღირსეული კანდიდატებისთვის დამსახურებულია. ეს მნიშვნელოვანი გადადგმული ნაბიჯი იქნება მეორე ტურებისთვის და ასევე იმისათვის, რომ საკონსტიტუციო უმრავლესობას ყველანაირად შევეწინააღმდეგოთ, რაც ქვეყნისთვის დამღუპველია.

შინაგან საქმეთა სამინისტროსა და პოლიციას მოვუწოდებ საარჩევნო უბნებზე სიმშვიდე უზრუნველყონ, მათი მოვალეობა შეასრულონ, რათა უბნებზე კრიმინალები არ შეიკრიბონ. განმეორებითი არჩევნების მშვიდობიან გარემოში ჩატარება არის არამარტო ერთიანი ნაციონალური მოძრაობისთვის მნიშვნელოვანი, არამედ ქვეყნისთვის და ამიტომ შინაგან საქმეთა სამინისტროს მოვუწოდებ თავის ვალდებულებას პასუხისმგებლობით მიუდგეს".

ხვალ განმეორებითი არჩევნები ზუგდიდის მუნიციპალიტეტის 3 სოფელსა და მარნეულში ჩატარდება.