ოპოზიციური პარტიები ამბობენ, რომ ხელისუფლება ძალაუფლების შესანარჩუნებლად მზადაა ძალადობას გაუხსნას გზა. ამის შესახებ სამოქალაქო მოძრაობა ლელომ, შენების მოძრაობამ და ახალმა მემარჯვენეებმა განცხადება გაავრცელეს. მათი აზრით, პოლიტიკური კრიზისის განმუხტვის ნაცვლად მთავრობა ძალადობას აორგანიზებს და ახალისებს.

"მძიმე წარსულმა თუ რამე გვასწავლა ისაა, რომ პოლიტიკური განსვავებები, რაც არ უნდა მწვავე იყოს ის, უნდა წყდებოდეს პოლიტიკური პროცესით და არა ძალადობით და იმიტირებული კონტრ-აქციებით... საზოგადოება დაიღალა სიძულვილით, შიში, დაპირისპირებით. ის მზადაა განახლებისთვის, მას სჭირდება გონიერი, პასუხისმგებლობიანი, ქვეყანაზე და არა საკუთარ ძალაუფლებაზე ორიენტირებული ხელისუფლება", — წერია განცხადებაში.

ოპოზიცია სამოქალაქო დაპირისპირების ყველა შესაძლო შედეგზე სრულ პასუხისმგებლობას ქართულ ოცნებასა და ბიძინა ივანიშვილს აკისრებს. ისინი მოუწოდებენ ძალოვან უწყებებს იმოქმედონ კონსტრუქციულად და არა "დაკვეთების შესაბამისად", სამოქალაქო აქტივისტებს კი სიფხიზლისკენ.