კინოთეატრ ამირანთან ჰომოფობიური ჯგუფები ისევ შეიკრიბნენ, ამჯერად, ფილმ კომეტების ჩვენების გასაპროტესტებლად. გურამ ფალავანდიშვილი და მისი რამდენიმე მხარდამჭერი კინოთეატრის შესასვლელთან ჰომოფობიური შინაარსით ბანერებით დგანან.

როგორც ფალავანდიშვილი ამბობს, მათ კინოში შესვლა სურდათ, თუმცა ბილეთები ვერ იშოვეს. მანვე აღნიშნა, რომ ქუჩაში დგომას სეანსის დასრულებამდე აპირებს:

"ჩვენ გვინდოდა შესვლა კინოს გარჩევაზე. გვინდოდა, შეხვედრა რეჟისორთან, მაგრამ ბილეთები ვერ ვიშოვეთ. გვინდოდა აკადემიურად აგვეხსნა მისთვის, რატომ არ შეიძლება ფილმის დაშვება, მაგრამ უფლება არ მოგვეცა".

მისივე თქმით, თბილისის საერთაშორისო კინოფესტივალის განმავლობაში ისინი ლგბტ თემატიკის ყველა ფილმს გააპროტესტებენ. დღეს, 2 დეკემბერს კინოთეატრ ამირანში ქართველი რეჟისორის, თამარ შავგულიძის ფილმ კომეტების ჩვენება გაიმართება, რომელიც ორი ქალის სიყვარულზე მოგვითხრობს.

ადგილზე მობილიზებულია პოლიცია და მაყურებელს შეუფერხებლად შეუძლია კინოთეატრში შესვლა. ჰომოფობიური აქციის ერთ-ერთი მონაწილე შენობაში შესვლას ცდილობდა, თუმცა ის ტერიტორიიდან გაიყვანეს.

ჰომოფობიური პროტესტი And Then We Dance-ის წინააღმდეგ

8-9-10 ნოემბერს თბილისსა და ბათუმში ქართულ-შვედური ფილმის And Then We Danced-ის ქართული პრემიერის პარალელურად აქციები გაიმართა. თბილისში აქციის ორგანიზატორები ლევან ვასაძე, ქართული მარშის ლიდერი სანდრო ბრეგაძე და ჰომოფობიური დაჯგუფების წარმომადგენლები გურამ ფალავანდიშვილი და დიმიტრი ლორთქიფანიძე იყვნენ. ისინი სეანსების ჩაშლას ცდილობდნენ.

აგრესიული ჯგუფები მშვიდობიანი მოქალაქეებსა და სამართალდამცავებს პიროტექნიკას და სხვადასხვა ნივთს ისროდნენ, შემდეგ კი პარაკლისი გადაიხადეს. რაც შეეხება ბათუმში გამართულ ჩვენებას, კინოთეატრ აპოლოში დემონსტრანტებმა კვერცხები და შუშხუნები შეყარეს.

პოლიციისა და სპეცრაზმის მობილიზების მიუხედავად, აგრესიული პირების თავდასხმის გამო, თბილისში აქციაზე დაშავდნენ ანა სუბელიანი, დავით ბერძენიშვილი და ერთი პოლიციელი.

მიუხედავად პროტესტისა ჩვენება ყველა კინოთეატრში დაგეგმილ დროს დაიწყო და არცერთი სეანსი არ ჩაშლილა.

ფილმის პრემიერა კანის კინოფესტივალზე 16 მაისს შედგა, პირველი ქართული სასიყვარულო გეი დრამის ჩვენება კი თბილისის კინოთეატრებში 8-10 ნოემბერს იმართება. And Then We Danced ახალგაზრდა მოცეკვავის, მერაბის ცხოვრების შესახებ გვიყვება, რომელიც რადიკალურად იცვლება, მას შემდეგ, რაც მას ამბიციური მეტოქე შეუყვარდება.

და ჩვენ ვიცეკვეთ, რომელმაც არაერთი საერთაშორისო ჯილდო მოიპოვა, ამერიკის კინოაკადემიის დაჯილდოვების 92-ე ცერემონიალზე, საერთაშორისო სრულმეტრაჟიანი ფილმის (იგივე უცხოენოვანი ფილმის) კატეგორიაში შვედეთის სახელითაა გაგზავნილი. მისი რეჟისორი ლევან აკინია, რომელიც წარმოშობით საქართველოდანაა.