მოძრაობის ქვეყნის სამსახურშის წევრი, შოთა დიღმელაშვილი ქართული ოცნების დეპუტატს, ირაკლი კობახიძეს აქციის მონაწილეების სიმცირეზე გაკეთებულ რეპლიკაზე პასუხობს:

"დღეს ძველბიჭობა დაუწყია კობახიძეს, მუშტებზე იყურებოდა და მაგ "ფუფლოს" მინდა, შევთავაზო, რომ ისე გავარკვიოთ ეს საკითხი, დეპუტატის შეურაცხყოფისთვის არავინ ციხეში არ მოხვდეს. ვთავაზობ 3 რაუნდს ნებისმიერ რინგზე, თვითონ თუ უნდა, ჩაფხუტი დაიხუროს".

მისი თქმით, ეს პროცესები დამღლელია არა საზოგადოებისთვის, არამედ ხელისუფლებისთვის.

"პოლიცია მობილიზებულია, პოლიციური რესურსიც აღარ ჰყოფნით, აგრეთვე გუშინ გამოვიდა შინაგან საქმეთა მინისტრი და საკუთარ თავს მისცა ბოლო ვადა რომ 3-4 თვე შეგვიძლია ამის უზრუნველყოფაო, ამ ქოსატყუილებისგან 3-4 თვე ალბათ ნიშნავს 3-4 კვირას. ჩვენ გავაგრძელებთ იგივეს...", — თქვა შოთა დიღმელაშვილმა ტელეკომპანია ფორმულასთან საუბარში.

დღეს, 29 ნოემბერს ირაკლი კობახიძემ ჟურნალისტებს უთხრა, რომ მათ უმრავლესობის წევრების "ემოციების დარეგულირება უწევთ" საპროტესტო აქციებთან დაკავშირებით:

"გვიწევს დეპუტატების შეკავება იმისათვის, რომ არ გამოხატონ ემოციები, გარე აქციასთან დაკავშირებით. ეს 100 დეპუტატი ეყოფა იმ 198 კაცს, რომლებიც არიან პარლამენტის გარშემო, თუ ემოციებზე არის საუბარი... შეაფასონ საკუთარი რესურსები და 200 კაცით მუშტებს ნუ აბრახუნებენ".

პროპორციულ საარჩევნო სისტემაზე გადასვლის მოთხოვნით მთელი ოპოზიციური სპექტრი გაერთიანდა ლოზუნგით "ყველა მინუს ერთი!". საერთო მიზნით, დაინიშნოს ვადამდელი არჩევნები პროპორციული სისტემით, გაერთიანდნენ თავისუფალი დემოკრატები, რესპუბლიკელები, ევროპული საქართველო, ნაციონალური მოძრაობა, ახალი საქართველო, ლეიბორისტული პარტია, გირჩი, კანონი და სამართალი, ასევე, მათ გვერდით დადგნენ: ნინო ბურჯანაძე, გუბაზ სანიკიძე, ეკა ბესელია.