მმართველი პარტიის დეპუტატი სოფო კილაძე აცხადებს, რომ პარლამენტში დილით ადრე პიკეტის თავიდან ასარიდებლად არ მისულა. მისი თქმით, ის ყოველთვის ადრე მიდის სამსახურში.

"თქვენ იცით, რომ სოფო კილაძე არის ერთ-ერთი ის დეპუტატი, რომელიც ძალიან ადრე მოდის ხოლმე. ადრე მოვედი დღეს, დიახ, მქონდა გარკვეული პოლიტიკური საკითხები გასავლელი. მე შვიდზეც და რვაზეც გინახივართ პარლამენტში. სხვა დეპუტატები რატო მოვიდნენ ადრე, მათ ჰკითხეთ", — ასე უპასუხა მან მთავარი არხის ჟურნალისტის კითხვას.

დღეს, 29 ნოემბერს ქართული ოცნების დეპუტატები პარლამენტში დილით ადრე, პიკეტის დაწყებამდე შევიდნენ. პარლამენტის მიმდებარე ქუჩები პოლიციას რკინის ჯებირებით აღარ გადაუკეტავს.

ნაციონალური მოძრაობის წევრმა, ზურაბ მელიქიშვილმა აღნიშნა, რომ პიკეტმა შედეგი უკვე გამოიღო და ხელისუფლებამ დეპუტატები პარლამენტში დილის 7 საათზე შეიყვანა. დეპუტატები ამ ფაქტს უარყოფენ და აცხადებენ, რომ მათ პარლამენტში საქმეები ჰქონდათ.

ბოლო დღეების მოვლენები

მას შემდეგ, რაც ქართული ოცნების დეპუტატებმა პროპორციული საარჩევნო სისტემის კანონპროექტი ჩააგდეს, საქართველოს მასშტაბით სხვადასხვა ქალაქებში საპროტესტო აქციები იმართება. პროტესტის ფარგლებში პიკეტირებული იყო მთავარი საკანონმდებლო ორგანოც, რომლის შესასვლელებიც ხელისუფლებამ ორჯერ სპეცრაზმისა და წყლის ჭავლის გამოყენებით გახსნა.

აქციის დაშლის შემდეგ ოპოზიციამ და სამოქალაქო აქტივისტებმა პროტესტი ახალი ფორმა "მაინც დაგაბოქლომებთ" დაიწყეს. ისინი სხვადასხვა ადმინისტრაციულ შენობებსა და ქართული ოცნების დეპუტატების ოფისებს ბოქლომებს ადებენ.

მას შემდეგ, რაც პარლამენტის პიკეტი მესამედ დაანონსდა, ხელისუფლებამ პარლამენტის მიმდებარე ქუჩები რკინის კონსტრუქციებით ჩაკეტა. კონსტრუქციები ხელს უშლიდა მოქალაქეებს გადაადგილებაში. პოლიციამ გზები აქციის დაშლის შედეგ გაათავისუფლა.