ქართული ოცნების ვიცე-სპიკერი, მამუკა მდინარაძე პარლამენტში შესვლის საკითხზე ამბობს, რომ უხერხულობა და დისკომფორტი პრიორიტეტული არაა. ასე უპასუხა მან პოლიციის მიერ აგებული რკინის ჯებირების გავლის შემდეგ ჟურნალისტების კითხვებს.

"რადგან თქვენ ესე გგონიათ მე არ შეგისწორებთ. მე არ მგონია, რომ დისკომფორტი უხერხულობა ის საკითხებია, რომლებიც უნდა იყოს პრიორიტეტული მითუმეტეს სახელწიფოს და საქართველოს პარლამენტის ნორმალურ ფუნქციონირებასთან მიმართებით", — თქვა მამუკა მდინარაძემ.

მისი თქმით, დიალოგი და სუაბარი შეიძლება მას შემდეგ, რაც "ესენი დაეშვებიან მიწაზე" და მიხვდებიან, რომ მარგინალური მეთოდების გამოყენება არ არის შედეგიანი.

დღეს, 28 ნოემბერს პარლამენტთან აქცია იმართება. ოპოზიცია და სამოქალაქო აქტივისტები ცდილობენ დეპუტატები შენობაში არ შეუშვან. პარლამენტთან მობილიზებულია პოლიცია და ყველა შესასვლელთან რკინის ჯებირებია აღმართული. 26 ნოემბერს, გამთენიისას პარლამენტთან შეკრებილი აქტივისტები, ისევ სპეცრაზმისა და წყლის ჭავლის გამოყენებით დაშალეს. დაშავდა 3 ადამიანი, 28 კი დააკავეს. გასული 12 საათის განმავლობაში პოლიცია აქციის მონაწილეებს ხელს უშლიდა და ართმევდა შეშას და რკინის კასრებს, რომლითაც მათ ღამით გათბობა სურდათ. შინაგან საქმეთა სამინისტროს პრესსამსახურის ვერსიით, ეს იყო კანონის მოთხოვნების შესრულება. ამ შეზღუდვას გამოეხმაურა სახალხო დამცველიც. მან განმარტა, რომ მსგავსი შეზღუდვა კანონიერი არაა.

ბოლო დღეების მოვლენები

მას შემდეგ, რაც ქართული ოცნების დეპუტატებმა პროპორციული საარჩევნო სისტემის კანონპროექტი ჩააგდეს, საქართველოს მასშტაბით სხვადასხვა ქალაქებში საპროტესტო აქციები იმართება. პროტესტის ფარგლებში პიკეტირებული იყო მთავარი საკანონმდებლო ორგანოც, რომლის შესასვლელებიც ხელისუფლებამ სპეცრაზმისა და წყლის ჭავლის გამოყენებით გახსნა.

აქციის დაშლის შემდეგ ოპოზიციამ და სამოქალაქო აქტივისტებმა პროტესტი ახალი ფორმა "მაინც დაგაბოქლომებთ" დაიწყეს. ისინი სხვადასხვა ადმინისტრაციულ შენობებს ბოქლომებს ადებენ. პროტესტის მონაწილეებმა სიმბოლურად უკვე "დააბოქლომეს" პროკურატურა, სახელმწიფო უსაფრთხოების სამსახური, მთავრობის კანცელარია. ასევე, ისინი ბოქლომს ადებენ მაჟორიტარი დეპუტატების ოლქებს.

ოპოზიციამ და მათმა მხარდამჭერებმა აჭარის უმაღლესი საბჭოს ჭიშკარზე ბოქლომი ჩამოკიდეს. გარდა ამისა, ბოქლომები დაადეს პარლამენტის თავმჯდომარის, არჩილ თალაკვაძისა და დეპუტატ მიხეილ ყაველაშვილის ბიუროს ოფისებს. "დაბოქლომებულია" ასევე მთავრობის კანცელარია, პროკურატურა და პრეზიდენტის რეზიდენცია.