მოძრაობა გაბედეს აქტივისტებმა პარლამენტთან, რკინის ჯებირების წინ სიმბოლური საზღვარი გაავლეს, რომელზე ბიძინა ივანიშვილის 41-დოლარიანებია ჩამოკიდებული.

ფოტო: თამუნა გეგიძე / On.ge

მათი თქმით, ეს საზღვარი თვითონ ბიძინა ივანიშვილმა გაავლო. გარდა ამისა, მათ ადგილზე შეშა მიიტანეს, "რომლისაც ბიძინა ივანიშვილს ყველაზე მეტად ეშინია".

ბოლო დღეების მოვლენები

მას შემდეგ, რაც ქართული ოცნების დეპუტატებმა პროპორციული საარჩევნო სისტემის კანონპროექტი ჩააგდეს, საქართველოს მასშტაბით სხვადასხვა ქალაქებში საპროტესტო აქციები იმართება. პროტესტის ფარგლებში პიკეტირებული იყო მთავარი საკანონმდებლო ორგანოც, რომლის შესასვლელებიც ხელისუფლებამ ორჯერ სპეცრაზმისა და წყლის ჭავლის გამოყენებით გახსნა.

აქციის დაშლის შემდეგ ოპოზიციამ და სამოქალაქო აქტივისტებმა პროტესტი ახალი ფორმა "მაინც დაგაბოქლომებთ" დაიწყეს. ისინი სხვადასხვა ადმინისტრაციულ შენობებსა და ქართული ოცნების დეპუტატების ოფისებს ბოქლომებს ადებენ.

მას შემდეგ, რაც პარლამენტის პიკეტი მესამედ დაანონსდა, ხელისუფლებამ პარლამენტის მიმდებარე ქუჩები რკინის კონსტრუქციებით ჩაკეტა. კონსტრუქციები ხელს უშლიდა მოქალაქეებს გადაადგილებაში. პოლიციამ გზები აქციის დაშლის შედეგ გაათავისუფლა.