გირჩის ლიდერი, ზურა ჯაფარიძე ამბობს, რომ მთავრობა თვითონ იკეტავს საკუთარ თავს. ასე შეაფასა მან პოლიციელების მიერ პარლამენტთან და მთავრობის ადმინისტრაციასთან მისასვლელი გზების რკინის კონსტრუქციებით გადაკეტვა.

"მე-13 რაიონი აქვთ გაკეთებული. შემოღობეს რკინის ჯებირებით, რას ფიქრობენ და ასე როგორ აპირებენ მუშაობის გაგრძელებას, არ ვიცი. კარგია, ეს სურათი არის მინიმუმი, რაც უნდა იდოს სულ. ამ ინსტიტუტმა ვერ უნდა შეძლოს მუშაობა... ძალიან დიდ წრეებს ვარტყამ და მეცინება, მართლა მე-13 რაიონი აქვთ მოწყობილი", — თქვა მან.

ზურა ჯაფარიძე ამბობს, რომ მთავრობა თვითონ იკეტავს საკუთარ თავს და პარლამენტის რკინის ჯებირებით შემოსაზღვრას ფეისბუქზეც გამოეხმაურა.

"ჩიტაძეზე მე-13 რაიონს იღებენ", — დაწერა მან.

დილიდან საკანონმდებლო ორგანოს პიკეტირება იგეგმებოდა, თუმცა პოლიცია ოპოზიციის წევრებს მომზადებული დახვდა. პარლამენტის შენობის ყველა შესასვლელთან პოლიცია მობილიზებულია. საკანონმდებლო ორგანოსთან მისასვლელი ყველა გზა რკინის ჯებირებით არის გადაკეტილი.

ფოტო: თამუნა გეგიძე / On.ge

ფოტო: თამუნა გეგიძე / On.ge

პარლამენტის პიკეტირება 26 ნოემბერს დაანონსდა. მოქალაქეები, რომლებიც ბიძინა ივანიშვილის დაპირების არშესრულებას აპროტესტებენ თითქმის 10 დღეა აქციას მართავენ. მათ უნდათ, რომ პროპორციულ სისტემაზე გადასვლის კანონპროექტის ჩამგდები მმართველი პარტიის წევრები პარლამენტში არ შეუშვან. პარლამენტის სხდომებს ბოიკოტის ნიშნად არ ესწრება ნაციონალური მოძრაობა, ევროპული საქართველო და სხვა დამოუკიდებელი დეპუტატები.