ხვალ რომ საპარლამენტო არჩევნები ტარდებოდეს მოქალაქეთა 26 პროცენტი ხმას ქართულ ოცნებას მისცემდა, 44% კი (ჯამურად) ოპოზიციურ პარტიებს. ასეთია კვლევის შედეგები, რომელიც ტელეკომპანია ფორმულას დაკვეთით Edison Research-მა ჩაატარა.

კვლევის მიხედვით პარტიების ხუთეული ასე გამოიყურება:

  1. ქართული ოცნება: ბიძინა ივანიშვილი — 26%
  2. ერთიანი ნაციონალური მოძრაობა: გრიგოლ ვაშაძე/მიხელ სააკაშვილი — 18%
  3. ევროპული საქართველო: დავით ბაქრაძე/გიგი უგულავა — 6%
  4. ლეიბორისტული პარტია: შალვა ნათელაშვილი — 4%
  5. პატრიოტთა ალიანსი: დავით თარხან-მოურავი ირმა ინაშვილი — 3%.

გირჩს, ლელოს, ალეკო ელისაშვილის სამოქალაქო მოძრაობასა და გიორგი ვაშაძის პარტიას — ახალი საქართველოსთვის ერთნაირი, 2%-იანი მხარდაჭერა აქვთ. ნინო ბურჯანაძის, დავით უსუფაშვილის, კახა კუკავას, ეკა ბესელიასა და ირაკლი ოქრუაშვილის პარტიებს კი ერთნაირად, მოსახლეობის 1% მისცემდა ხმას. გამოკითხუთა 30%-მა კითხვას არ უპასუხა, ან გადაუწყვეტელია.

კვლევა მას შემდეგ ჩატარდა, რაც ბიძინა ივანიშვილის დაპირება არ შესრულდა და პარლამენტმა პროპორციულ საარჩევნო სისტემაზე გადასვლას მხარი არ დაუჭირა. ქართული ოცნების დეპუტატების ამ გადაწყვეტილებას ხელახალი საპროტესტო ტალღა მოჰყვა. მსგავსი კვლევა ნოემბრის თვეში საერთაშორისო რესპუბლიკურმა ინსტიტუტმაც გამოაქვეყნა, ამ კვლევის მონაცემებით ქართულ ოცნებას მოქალაქეთა 23 პროცენტი მისცემდა ხმას, 41 პროცენტი კი ოპოზიციურ პარტიებს.

კვლევა ფორმულას დაკვეთით Edison Research-მა 12 ნოემბრიდან 23 ნოემბრის ჩათვლით ჩაატარა. საქართველოს მასშტაბით საარჩევნო ხმის მქონე 2000 რესპონდენტი პირისპირ ინტერვიუს გზით გამოკითხა, კვლევის ცდომილება კი 2,2 პროცენტია.