"ამ მოვლენებთან არაფერ შუაშია" — ასე პასუხობს უმრავლესობის ლიდერი მამუკა მდინარაძე კითხვას იმაზე, თუ რას ფიქრობს საპროტესტო აქციების დროს პრეზიდენტის სალობიეში ყოფნაზე. ამის შესახებ მან ტელეკომპანია პირველის ეთერში განაცხადა.

"სალომე ზურაბიშვილი ამ მოვლენებთან არაფერ შუაშია, თუ ვინმეს გაპროტესტება უნდოდა ჩვენ რაც გავაპროტესტეთ, ის გაეპროტესტებინა — მკვლელების შეწყალება. აქ რა შუაშია ზურაბიშვილი საერთოდ წარმოუდგენელია. რა თქმა უნდა არ ეხება, გადაწყვეტილებაზე [პროპორციულის ჩაგდება] გავლენას მოახდენდა თუ რა", — აცხადებს მდინარაძე.

მას შემდეგ, რაც ინგა გრიგოლიამ მას შეახსენა, რომ წლების წინ ექსპრეზიდენტ მიხეილ საააკაშვილის ქცევასაც აპროტესტებდნენ, როცა ის პროტესტის პარალელურად სუში ბარში წავიდა, მდინარაძემ განაცხადა:

"აბსოლუტურად ტენდენციურია სააკაშვილის შეფასება ზურაბიშვილთან. სუში და ლობიოს განსხვავება კი არ არის აქ, განსხვავება სხვა რამეშია. ის ადამიანი [სააკაშვილი] ლობირებდა მკვლელებს. თუ თქვენ განსხვავებას ვერ ხედავთ მაშინ რა იყო გასაპროტესტებელი და ახლა რა არის, მაშინ ჩვენ კამათს აზრი არ ექნება".

26 ნოემბერს ზუსტად იმ დროს, როცა პრეზიდენტი სალობიეში იყო, თბილისში აქცია იმართებოდა. როდესაც ეს აქციის მონაწილეებმა გაიგეს, მათი ნაწილი სალობიესთან გადავიდა, სადაც "მონა, მონას" სკანდირებდნენ. რესტორნის დატოვება ზურაბიშვილს პოლიციის კორდონის გავლით მოუწია.

პრეზიდენტმა მედიასთან ამ საკითხზე არ ისაუბრა.

"სამწუხაროდ, არ არის არაფერი საკომენტარო", — უთხრა მან მის სახლთან მისულ ტელეკომპანია რუსთავი 2-ს.

დღეს გამთენიისას პარლამენტთან შეკრებილი აქტივისტები ისევ სპეცრაზმისა და წყლის ჭავლის გამოყენებით დაშალეს. შინაგან საქმეთა სამინისტროს განცხადებით, 26 ნოემბერს აქციის დაშლისას 28 პირი დააკავეს. მათივე თქმით, სამმა პირმა სხვადასხვა სახის დაზიანება მიიღო.

გასული 12 საათის განმავლობაში პოლიცია აქციის მონაწილეებს ხელს უშლიდა და ართმევდა შეშას და რკინის კასრებს, რომლითაც მათ ღამით გათბობა სურდათ. შინაგან საქმეთა სამინისტროს პრესსამსახურის ვერსიით, ეს იყო კანონის მოთხოვნების შესრულება. ამას გამოეხმაურა სახალხო დამცველიც და განმარტა, რომ მსგავსი შეზღუდვა კანონიერი არაა.

პარლამენტის შენობასთან მისასვლელი ყველა გზა გადაკეტილია. შენობის სამივე შესასვლელთან მობილიზებულია პოლიცია. ჩიტაძისა და ჭიჭინაძის ქუჩებზე, სადაც პარლამენტის გვერდითა შესასვლელები გზა ყვითელი ავტობუსებითაა ჩახერგილი.

ბოლო დღეების მოვლენები

მას შემდეგ, რაც ქართული ოცნების დეპუტატებმა პროპორციული საარჩევნო სისტემის კანონპროექტი ჩააგდეს, საქართველოს მასშტაბით სხვადასხვა ქალაქებში საპროტესტო აქციები იმართება. პროტესტის ფარგლებში პიკეტირებული იყო მთავარი საკანონმდებლო ორგანოც, რომლის შესასვლელებიც ხელისუფლებამ სპეცრაზმისა და წყლის ჭავლის გამოყენებით გახსნა.

აქციის დაშლის შემდეგ ოპოზიციამ და სამოქალაქო აქტივისტებმა პროტესტი ახალი ფორმა "მაინც დაგაბოქლომებთ" დაიწყეს. ისინი სხვადასხვა ადმინისტრაციულ შენობებს ბოქლომებს ადებენ. პროტესტის მონაწილეებმა სიმბოლურად უკვე "დააბოქლომეს" პროკურატურა, სახელმწიფო უსაფრთხოების სამსახური, მთავრობის კანცელარია. ასევე, ისინი ბოქლომს ადებენ მაჟორიტარი დეპუტატების ოლქებს.

ოპოზიციამ და მათმა მხარდამჭერებმა აჭარის უმაღლესი საბჭოს ჭიშკარზე ბოქლომი ჩამოკიდეს. გარდა ამისა, ბოქლომები დაადეს პარლამენტის თავმჯდომარის, არჩილ თალაკვაძისა და დეპუტატ მიხეილ ყაველაშვილის ბიუროს ოფისებს. "დაბოქლომებულია" ასევე მთავრობის კანცელარია, პროკურატურა და პრეზიდენტის რეზიდენცია.