ევროპული საქართველოს ლიდერი გიგა ბოკერია, რომელიც აქციაზე წალმის მიტანის გამო სამართალდამცავებმა ტერიტორიიდან გაიყვანეს აცხადებს, რომ პროცესში ათეულობით პოლიციელი მონაწილეობდა. მისი თქმით, ისინი აგრესიულები იყვნენ და "ფიზიკური ძალადობის სურვილი ჰქონდათ".

"შეშა პოლიციელებს ესროლესო, წალამს ვერავის ვერ ესვრი, ამიტომ წამოვიღეთ. წალმის ამოსაღებად ჩაატარეს დიდი ოპერაცია. იყო მრავალი აათეული პოლიციელი, უკანონოდ გააჩერეს მანქანა, წაართვეს აქტივისტებს წალამი და ამ ჭიდაობაში ბატონი [თენგიზ] გუნავა და მეც დამაკავეს", — განუცხადა მან ფორმულას.

ორივე დეპუტატი პარლამენტის მიმდებარე ტერიტორიიდან პოლიციამ მაშინ წაიყვანა, როდესაც რუსთაველზე შეკრებილების გასათბობად წალამი მიჰქონდათ. შინაგან საქმეთა სამინისტროს მტკიცებით, დეპუტატები არ დაუკავებიათ.

საქართველოს კანონმდებლობით, პარლამენტის დეპუტატს იმუნიტეტი იცავს და მისი დაკავება, გარდა მძიმე სისხლის სამართლის დანაშაულისა, აკრძალულია. ბოკერია ამ ეტაპისთვის უკვე თავისუფალია, გუნავას შემთხვევაში დეტალები უცნობია.

ბოლო რამდენიმე საათი პოლიცია აქციის მონაწილეებს, მათ შორის პარლამენტის დეპუტატებს უკრძალავს და ართმევს შეშას, რომელიც მათ რუსთაველზე აქციის მონაწილეთა გასათბობად მიაქვთ. შინაგან საქმეთა სამინისტროს განმარტებით, ეს პოლიციელების მხირდან კანონიერი ქმედებაა.

ბოლო დღეების მოვლენები

მას შემდეგ, რაც ქართული ოცნების დეპუტატებმა პროპორციული საარჩევნო სისტემის კანონპროექტი ჩააგდეს, საქართველოს მასშტაბით სხვადასხვა ქალაქებში საპროტესტო აქციები იმართება. პროტესტის ფარგლებში პიკეტირებული იყო მთავარი საკანონმდებლო ორგანოც, რომლის შესასვლელებიც ხელისუფლებამ სპეცრაზმისა და წყლის ჭავლის გამოყენებით გახსნა.

აქციის დაშლის შემდეგ ოპოზიციამ და სამოქალაქო აქტივისტებმა პროტესტი ახალი ფორმა "მაინც დაგაბოქლომებთ" დაიწყეს. ისინი სხვადასხვა ადმინისტრაციულ შენობებს ბოქლომებს ადებენ. პროტესტის მონაწილეებმა სიმბოლურად უკვე "დააბოქლომეს" პროკურატურა, სახელმწიფო უსაფრთხოების სამსახური, მთავრობის კანცელარია. ასევე, ისინი ბოქლომს ადებენ მაჟორიტარი დეპუტატების ოლქებს.

ოპოზიციამ და მათმა მხარდამჭერებმა აჭარის უმაღლესი საბჭოს ჭიშკარზე ბოქლომი ჩამოკიდეს. გარდა ამისა, ბოქლომები დაადეს პარლამენტის თავმჯდომარის, არჩილ თალაკვაძისა და დეპუტატ მიხეილ ყაველაშვილის ბიუროს ოფისებს. "დაბოქლომებულია" ასევე მთავრობის კაცელარია, პროკურატურა და პრეზიდენტის რეზიდენცია.