მმართველი პარტიის მაჟორიტარი დეპუტატი მიხეილ ყაველაშვილი სისულელეს უწოდებს ინფორმაციას იმის შესახებ, რომ პარლამენტის პიკეტის დაშლისას გირჩის წევრმა სახის ძვლები მოტეხილობა მიიღო.

"როდის იყო დარბევა... კაი, კაი არ გრცხვენიათ? ბალეტს შეადარეს ისე... [დაზარალებულზე] კაი, კაი, რა სისულელეს იძახი", — განუცხადა ყაველაშვილმა მთავარ არხს.

პარტია გირჩის მმართველი საბჭოს წევრი, იმედა კლდიაშვილი დაზარალებულის სტატუსის მინიჭებას მოითხოვს. მისი თქმით, აქციის დაშლისას სახის ძვლების მოტეხილობა მიიღო.

"ფარებს რომ მივაწექით, აღმოვჩნდით სპეცრაზმს შორის და მაგ დროს მომხვდა ორი მუშტი და მერე გავითიშე", — ამბობს კლდიაშვილი ფორმულა ნიუსთან.

18 ნოემბერს სპეცნაზმმა აქციის დაშლა და კარვების აყრა დაიწყო. სამართალდამცავებმა დემონსტრანტების წინააღმდეგ წყლის ჭავლი გამოიყენა. ამის შემდეგ ქართული ოცნების დეპუტატები პარლამენტში შევიდნენ და ბიუროს სხდომა გამართეს.

დაშლისას 37 ადამიანი დააკავეს. მოსამართლე ვალერიან ფილიშვილმა დაკავებულებიდან 10 პირს, მათ შორის გიგა მაქარაშვილს, ზუკა ბერძენიშვილსა და ბექა ბასილაიას მოსამართლემ პატიმრობა შეუფარდა. გარდა ამისა, ერთ შენიშვნა დაეკისრა, ხოლო კიდევ ერთს 1 000-ლარიანი ჯარიმა. დანარჩენი 25 ადამიანი საქმე კი მოსამართლის მოუცლელობის გამო გაურკვეველი დროით გადაიდო.

აქცია თბილისის ქუჩებში მას შემდეგ იმართება, რაც ბიძინა ივანიშვილის დაპირება არ შესრულდა. მმართველმა პარტიამ ჩააგდო საკონსტიტუციო ცვლილებების პროექტი, რომლითაც ქვეყანაში 2020 წლის არჩევნები სრულად პროპორციული წესით უნდა ჩატარებულიყო. მმართველი პარტიის ამ გადაწყვეტილებამ ოპოზიციური პარტიები საერთო მოთხოვნის ირგვლივ გააერთიანა. მოთხოვნას იზიარებენ სამოქალაქო სექტორის წარმომადგენლები და მოძრაობა ქვეყნის სამსახურში.