აუდიტის სამსახურის ანგარიშის მიხედვით, წყალსადენი, რომელზეც გორის მუნიციპალიტეტმა 2,5 მილიონი ლარი დახარჯა, გაუმართავია და მის შესაკეთებლად დამატებით 220 000 ლარი უნდა დაიხარჯოს.

უწყების ინფორმაციით, მიუხედავად იმისა, რომ სოფელ ატენის წყალსადენის რეაბილიტაცია 2016-17 წლებში ჩატარდა, 2019 წლის თებერვალში აუდიტის შემოწმებისას აღმოჩნდა, რომ მოსახლეობის ნაწილს წყალი შეფერხებით მიეწოდება ან საერთოდ არ აქვს. მათი თქმით, ეს მუნიციპალიტეტმა წყლის დებეტის კლებით ახსნა.

აუდიტში ამბობენ, რომ 2017 წელს სოფელ ატენში გზის სარეაბილიტაციო სამუშაოებმა მიწისქვეშა წყალშემცველი ფენები დააზიანა, რამაც გამოიწვია წყლის დებეტის კლება. მათივე თქმით, სავარაუდო პრობლემის შესახებ მუნიციპალიტეტმა საავტომობილო გზების დეპარტამენტს თავიდანვე აცნობა, მათ კი მწარმოებელ კომპანიას მიმართეს, რომ მუნიციპალიტეტთან ერთად ემუშავა. თუმცა, უწყებაში ამბობენ, რომ მუნიციპალიტეტმა ვერ წარადგინა მტკიცებულება იმისა, რომ მხარეებმა პრობლემის თავიდან აცილება სცადეს.

აუდიტის განცხადებით, ამის შემდეგ მუნიციპალიტეტმა დაკარგული წყლის საძიებო სამუშაოებზე შესყიდვა გამოაცხადა, რომლის ღირებულებაც 20 00 ლარია, ხოლო შესაბამისი სამუშაოების განსახორციელებლად ბიუჯეტში ამ ეტაპზე გათვალისწინებულია დაახლოებით 200 ათასი ლარი.