იუსტიციის მინისტრმა, თეა წულუკიანმა პოლიციელებს, სპეცრაზმს, შინაგან საქმეთა სამინისტროსა და თავად მინისტრსაც მადლობა გადაუხადა "მაღალი კლასის ოპერაციისთვის", რომელიც 18 ნოემბერს ჩაატარეს აქციის დაშლისას. მადლობები მან მოქალაქის, იუსტიციის მინისტრის და ვიცე-პრემიერის სტატუსით გადაიხადა.

წულუკიანი პირველი არ არის, ვინც აქციის დაშლის გამო სპეცრაზმს მადლობა გადაუხადა. ყველაზე ადრე მომხდარს სახელმწიფო უსაფრთხოების სამსახურის უფროსის ყოფილი მოადგილე სოსო გოგაშვილი გამოეხმაურა და აქციის დაშლის დროს დაწერა: "ტერორისტებისგან წმენდა მიმდინარეობს, ბიჭებო ბრავო".

გარდა ამისა, სპეცოპერაცია შეაქო ქართული ოცნების გენერალურმა მდივანმა და ქალაქის მერმა, კახა კალაძემაც. მისი თქმით, პოლიციამ გამოიჩინა მაღალი პროფესიონალიზმი და იმოქმედა კვალიფიციურად, აღადგინა წესრიგი და პროცესები კანონის ჩარჩოში დააბრუნა.

ბოლო დღეების მოვლენები მოკლედ

ამჟამად პარლამენტის შენობა ბლოკირებული აღარ არის. აქციის მონაწილეები ამბობდნენ, რომ არ შეუშვებდნენ არც ერთ დეპუტატს. შესასვლელებში გაშლილი იყო კარვები და დააწყეს ტომრები, ევროპულმა საქართველომ ყველა შესასვლელ ჭიშკარს სიმბოლურად ბოქლომი დაადო.

ასევე, პიკეტი მოხსნეს პარლამენტის შესასვლელებს. აქციის დაშლისას მინიმუმ 37 ადამიანი დააკავეს. ამ ოპერაციის შემდეგ დეპუტატები პარლამენტში შევიდნენ და ბიუროს სხდომა გამართეს.

აქცია თბილისის ქუჩებში მას შემდეგ იმართება, რაც ბიძინა ივანიშვილის დაპირება არ შესრულდა. მმართველმა პარტიამ ჩააგდო საკონსტიტუციო ცვლილებების პროექტი, რომლითაც ქვეყანაში 2020 წლის არჩევნები სრულად პროპორციული წესით უნდა ჩატარებულიყო. მმართველი პარტიის ამ გადაწყვეტილებამ ოპოზიციური პარტიები საერთო მოთხოვნის ირგვლივ გააერთიანა. მოთხოვნას იზიარებენ სამოქალაქო სექტორის წარმომადგენლები და მოძრაობა ქვეყნის სამსახურში.