მეოთხე მცდელობისას აჭარის ტელევიზიის დირექტორობის სურვილი 10-მა კანდიდატმა გამოთქვა. განაცხადების მიღება დღეს, 20 ნოემბერს 18 საათზე დასრულდა.

აჭარის ტელევიზიის ინფორმაციით, კანდიდატთა შორის 7 მაუწყებლის თანამშრომელია. გარდა ამისა, მსურველებიდან 6 წინა კონკურსებშიც მონაწილეობდა.

კანდიდატები არიან:

  1. გიორგი კოხრეიძე;
  2. დავით ჩხარტიშვილი;
  3. შოთა გუძაბიძე;
  4. შოთა გურაბანიძე;
  5. ნათია შავაძე;
  6. ნათია ზოიძე;
  7. ფირუზ ბოლქვაძე;
  8. ლაშა ზარგინავა;
  9. მაია მერკვილაძე;
  10. შოთა ზოიძე.

18 ნოემბერს ქუთაისის სააპელაციო სასამართლომ გააუქმა ბათუმის საქალაქო სასამართლოს მიერ მიღებული გადაწყვეტილება დირექტორის ასარჩევი კონკურსის შეჩერების შესახებ. შეგახსენებთ, რომ მეოთხე კონკურის შეჩერება, ვადის ამოწურვამდე ორი დღით ადრე ერთ-ერთმა კანდიდატმა, გიორგი კოხრეიძემ მოითხოვა. აქედან გამომდინარე კონკურსის ვადა ზუსტად ორი დღით გახანგრძლივდა და დღეს ამოიწურა.

ცვლილებები აჭარის ტელევიზიაში

19 აპრილს ნათია კაპანაძის დირექტორის თანამდებობიდან გადაყენებას ხუთი მრჩევლიდან ოთხმა დაუჭირა მხარი. იმპიჩმენტის პროცესი ნაციონალური მოძრაობის კვოტით წარდგენილმა ირაკლი დარცმელიძემ და ქართული ოცნების დასახელებულმა გიგა ჩხარტიშვილმა დაიწყეს. ისინი აცხადებდნენ, რომ დირექტორი მოვალეობას ვერ ასრულებდა, რაც პრიორიტეტების შეუსრულებლობასა და ტელევიზიაში ხელფასებთან დაკავშირებით არსებულ პრობლემებში გამოიხატებოდა.

იმპიჩმენტის მოთხოვნაზე ინფორმაციის გავრცელების შემდეგ კაპანაძემ თქვა, რომ საფრთხე ექმნება სარედაქციო დამოუკიდებლობასა და მაუწყებლის გამართულ მუშაობას. მისი თქმით, მაუწყებელი პრიორიტეტებს იმ შესაძლებლობების ფარგლებში ასრულებდა, რაც აქვს.

კაპანაძის იმპიჩმენტის ინიციატივა არასამთავრობო ორგანიზაციებმა მკვეთრად უარყოფითად შეაფასეს და განაცხადეს, რომ მოვლენებს თვალს ადევნებენ. დირექტორს მხარი დაუჭირა საქართველოს სახალხო დამცველმა. პროცესებს გამოეხმაურა აშშ-ს საელჩო საქართველოში.

ნათია კაპანაძის დირექტორობის დროს არხი პირველად მოხვდა საერთაშორისო და ადგილობრივი ორგანიზაციების ანგარიშებში, როგორც ყველაზე დაბალანსებული ტელევიზია.

გაიგეთ მეტი: