ქუთაისის საკრებულოს ქართული ოცნების დეპუტატი, ოთარ ლორთქიფანიძე თბილისში მიმდინარე აქციას ეხმაურება და გაერთიანებული ოპოზიციის წევრს, ნიკა მაჭეტაძეს დამცინავად მოიხსენიებს.

"მაჭუს [ნიკა მაჭუტაძეს] დაბალი იმუნიტეტი აქვს და ნელ-თბილი წყალი ვაპკუროთ", — წერს ოთარ ლორთქიფანიძე.

ოთარ ლორთქიფანიძემ მალევე წაშალა ფეისბუქპოსტი და დაწერა განსხვავებული სტატუსი: "დემოკრატია vs დესტრუქცია".

სპეცრაზმმა პარლამენტის წინ ტერიტორია გაათავისუფლა და სამანქანო მოძრაობა უკვე აღდგენილია. ცენტრალურ შესასვლელთან აქციის მონაწილეების წინააღმდეგ გამოიყენეს წყლის ჭავლი და ძალადობრივი გზით, მიწოლით გაათავისუფლეს გზა. აქციის დაშლისას მინიმუმ 18 ადამიანი დააკავეს.

სპეცრაზმელებმა სპეციალური მანქანებით გაიტანეს ქვიშის ტომრები, რომლითაც ბარიკადები ჰქონდათ გაკეთებული მომიტინგეებს. ადგილზე დასუფთავების სამსახურის თანამშრომლები მიიყვანეს, რომლებაც ტერიტორია დაალაგეს. მიუხედავად ამისა რუსთაველის გამზირზე, პარლამენტის წინ აქცია და სიტყვით გამოსვლები გრძელდება.