სახალხო დამცველის პირველი მოადგილე გიორგი ბურჯანაძე პარლამენტთან არის მისული, სადაც მოქალაქეები არიან შეკრებილი და მობილიზებულია საპოლიციო ძალები.

"მნიშვნელოვანია, რომ პოლიტიკოსებს შორის იყოს მაქსიმალურად ბევრი დიალოგი, რომ ძალის გამოყენება და სიტუაციის ესკალაცია ავირიდოთ თავიდან", — განაცხადა მან On.ge-სთან საუბრისას.

პარლამენტში ბიუროს სხდომაა ჩანიშნული, თუმცა დეპუტატებს მომიტინგეები შენობაში დილიდან არ უშვებენ. On.ge-ის კითხვაზე, კანონის ნორმით, თუ ხელი ეშლება ადმინისტრაციული ორგანოს მუშაობას, გამართლებულია თუ არა სპეცრაზმის ჩარევა, სახალხო დამცველის პირველმა მოადგილემ, გიორგი ბურჯანაძემ უპასუხა:

"ნუ მომთხოვთ ამის შეფასებას, შესაბამისი ფაქტობრივი ცოდნა არ მაქვს და არც დაძაბულ გარემოში ამის ცოდნა არ მაქვს. მთავარია ავიცილოთ თავიდან ესკალაცია და ძალადობა. ამას სჭირდება დიალოგი, ესაა ყველაზე სწორი გამოსავალი".

პოლიცია აქციის მონაწილეებს დასაშლელად 30 წუთი მისცა. ამის შესახებ შინაგან საქმეთ სამინისტროს წარმომადგენელმა ჟურნალისტებთან განაცხადა. ეს განცხადება მან 16:12 საათზე გააკეთა.

"30 წუთის გასვლის შემდეგ პოლიცია იმოქმედებს კანონის შესაბამისად", — თქვა მან.

ბოლო რამდენიმე წუთია სპეცრაზმის თანამშრომელები სპეციალური ეკიპირებით იმოსებიან. უცნობია, რა დავალება აქვთ მათ მიღებული. ნიკა გვარამიას ინფორმაციით, მთავარი არხის ერთ-ერთი დამფუძნებელი, გიორგი რურუა დააკავეს.