"ბოლო წლების ყველაზე დიდი ანტისამთავრობო პროტესტის დროს 20 ათასზე მეტი დემონსტრანტი გამოვიდა თბილისის პარლამენტის წინ, ვადამდელი არჩევნების დანიშვნის მოთხოვნით", — წერს AFP 17 ნოემბერს გამართულ აქციაზე.

ამავე სტატიაში წერია, რომ ამერიკის შეერთებული შტატები და ევროკავშირი სოლიდარობას გამოხატავენ თბილისში დაწყებული ანტისამთავრობო აქციების მიმართ, ხოლო კანონპროექტის ჩაგდებაში ოპოზიცია ბრალს სდებს "ძლევამოსილ ოლიგარქს, ქართული ოცნების ლიდერს, ბიძინა ივანიშვილს".

ათასობით აქციის მონაწილე წერია Associated Press-ის სტატიაშიც, სადაც ნათქვამია, რომ დეპუტატებმა დაპირებული საკონსტიტუციო რეფორმა ჩააგდეს.

"დაპირება იყო ის საკვანძო საკითხი, რაც დააცხრობდა დაძაბულობას, რაც ზაფხულში, აქციის ძალადობრივად დაშლას მოჰყვა. მიუხედავად ამისა, ქართული ოცნების ბევრმა დეპუტატმა მხარი დაიჭირა ცვლილებების ჩაგდებას", — წერია Associated Press-ის სტატიაში.

სხვა საერთაშორისო გამოცემების მსგავსად Reuters-ც წერს, რომ თბილისში, კვირას აქციაზე 20 ათასამდე დემონსტრანტი ითხოვდა მთავრობის გადადგომას:

"აქციები მას შემდეგ დაიწყო, რაც პარლამენტმა სრულად პროპორციულ საარჩევნო სისტემაზე გადასვლის კანონპროექტი ჩააგდო. დეპუტატების თითქმის ნახევარი არჩეულია არა პარტიული სიით, არამედ, მაჟორიტარული სისტემით...".

Reuters წერს ევროსაბჭოს საპარლამენტო ასამბლეისა და აშშ-ს საელჩოს განცხადებებზეც, რომლებმაც იმედგაცრუება გამოხატეს კანონპროექტის ჩაგდების გამო და მოუწოდეს დეპუტატებს, იპოვონ გამოსავალი.

"3,7 მილიონიან პოსტსაბჭოთა ქვეყანაში ყველა მთავარი ოპოზიციური ძალა გაერთიანდა პროპორციული სისტემის კანონის მხარდასაჭერად, ხელისუფლების გადადგომისა და გარდამავალი მთავრობის დანიშვნის მოთხოვნით", — ნათქვამია Reuters-ის სტატიაში.