ადამიანის უფლებათა ცენტრი აცხადებს, რომ თბილისში, ატენის ქუჩაზე ერთ-ერთი გარდაცვლილი, ლევან აბაშიძე ძალოვან უწყებებს ზეწოლასა და მუქარაში ადანაშაულებდა.

17 ნოემბერს ატენის ქუჩაზე ერთი ოჯახის სამი წევრი გარდაცვლილი იპოვეს. გამოძიება დამამძიმებელ გარემოებაში განზრახ მკვლელობისა და იარაღისა და საბრძოლო მასალის მართლსაწინააღმდეგო შეძენა-შენახვის მუხლებით მიმდინარეობს.

როგორც ადამიანის უფლებათა ცენტრის ინფორმაციით, გარდაცვლილი ლევან აბაშიძე აცხადებდა, რომ საქართველოს ტერიტორიაზე შემოვლისას, საზღვარზე მას პრობლემები ექმნებოდა:

"მესაზღვრეები მას უცხადებდნენ, რომ მათ ინფორმაცია არ ჰქონდათ, თუ რატომ უზღუდავდნენ ქვეყნის ტერიტორიაზე შემოსვლას, მაგრამ ჰქონდათ დავალება, რომ იგი არ შემოეშვათ საქართველოში".

როგორც განცხადებაშია აღნიშნული, 2016 წელს ლევან აბაშიძე საქართველოს ტერიტორიაზე ადამიანის უფლებათა ცენტრის საქმეში ჩართვის შემდეგ შემოვიდა. ცენტრმა არაერთხელ მოუწოდა როგორც შინაგან საქმეთა სამინისტროს, ისე სახელმწიფო უსაფრთხოების სამსახურს, დაეცვათ ლევან აბაშიძის უსაფრთხოება და უზრუნელეყოთ საქართველოში აბაშიძის თავისუფლად და უსაფრთხოდ შემოსვლა, ასევე, ქვეყნის შიგნით თავისუფლად გადაადგილების უფლება.

ადამიანის უფლებათა ცენტრი ამბობს, რომ აბაშიძემ მათ 2016 წელს წერილობით მიმართ იმის შესახებ, რომ ძალოვანი უწყებების წარმომადგენლები ემუქრებოდნენ და მოითხოვდნენ, ქვეყანა დაეტოვებინა, წინააღმდეგ შემთხვევაში კი "საკუთარი თავისთვის დაებრალებინა, რაც დაემართებოდა".

ორგანიზაციისვე განცხადებით, 2018 წელს აბაშიძე საქართველოს ტერიტორიაზე შემოსვლისას პრობლემა კვლავ შეექმნა, რის გამოც მათ სამართალდამცავებს ისევ მიმართეს.

ადამიანის უფლებათა ცენტრი მოუწოდებს გამოძიებას, დაინტერესდეს აღნიშნული ფაქტებით და საბოლოო დასკვნებამდე სრულად უზრუნველყოს ყველა გარემოების მიუკერძოებელი, ობიექტური გამოკვლევა. გარდა ამისა, ცენტრში დაცულია ლევან აბაშიძის ვიდეომიმართვა, სადაც იგი საუბრობს დევნასა და შევიწროებაზე. ორგანიზაცია მზადაა ვიდეომიმართვა მიაწოდოს გამოძიებას და ასევე, მაღალი საზოგადოებრივი ინტერესიდან გამომდინარე — მედიას.