პატრიოტთა ალიანსის ლიდერი, ირმა ინაშვილი ამბობს, რომ აქციაზე ბევრად მეტი დემონსტრანტი იყო, ვიდრე 1 500 ადამიანი. მან საპატრულო პოლიციის ხელმძღვანელს, ვაჟა სირაძეს მოუწოდა, რომ უკეთ შეისწავლოს:

"მგონი, არ მიწყენს საპატრულო პოლიციის უფროსი, მაგრამ არ აწყენდა ჩაუღრმავდეს არითმეტიკას და გაცილებით კარგად შეისწავლოს, ვიდრე ჩანს რომ იცის".

საპატრულო პოლიციის უფროსის, ვაჟა სირაძის განცხადებით, დღეს, 17 ნოემბერს პარლამენტის წინ აქციაზე 5 500-მდე ადამიანი იმყოფებოდა. მისივე ინფორმაციით, 1 500 ადამიანამდე იყო რესპუბლიკის მოედანზე, სადაც აქციას პატრიოტთა ალიანსი მართავდა. მისივე თქმით, აქციებმა მშვიდ ვითარებაში, დაკავებების გარეშე ჩაიარა.

საპროტესტო აქციებთან დაკავშირებით წერს საერთაშორისო გამოცემა Reuters. მათი თქმით, რუსთაველის გამზირზე დაახლოებით 20 ათასი ადამიანი იყო შეკრებილი.

პარლამენტის წინ სხვადასხვა ოპოზიციური პარტიის და სამოქალაქო მოძრაობის მიერ ორგანიზებული საპროტესტო აქცია გაიმართა. ევროპულმა საქართველომ და ნაციონალურმა მოძრაობამ საკანონმდებლო ორგანოს პიკეტირება დააანონსეს. დემონსტრანტები აცხადებენ, რომ ორშაბათიდან პარლამენტში ქართულ ოცნების ვერც ერთი დეპუტატი ვეღარ შევა. მათ შენობის შესასვლელებთან კარვები გაშალეს და სიმბოლურად ბოქლომები დაკიდეს.