ავსტრიის ხელისუფლების გადაწყვეტილებით, დაინგრევა ის ისტორიული სახლი, სადაც 1889 წელს ნაცისტური გერმანიის დიქტატორი, ადოლფ ჰიტლერი დაიბადა. სახლი ავსტრიის ერთ–ერთ პატარა ქალაქ ბრაუნაში მდებარეობს. ინფორმაციას ავსტრიის ხელისუფლების გადაწყვეტილებაზე BBC ავრცელებს ადგილობრივ მედიაზე დაყრდნობით.

ცნობილია, რომ ადოლფ ჰიტლერი ამ სახლის მესამე სართულზე, ნაქირავებ ოთახში დაიბადა. ავსტრიის მთავრობა აღნიშნულ საცხოვრებელს მისი მეპატრონისგან 1972 წლის შემდეგ ქირაობს, რათა არ დაუშვას მისი გამოყენება სხვადასხვა მიზეზით. სახლის დანგრევაც იმის გამო გადაწყდა, რათა თავიდან აიცილონ მისი ნეონაცისტთა საკულტო ადგილად ქცევა.

უკვე რამდენიმე წელია ბრაუნაუს მთავრობა მოლაპარაკებას აწარმოებს სახლის მფლობელთან, თუმცა, გადაწყვეტილება მისი დანგრევის შესახებ ცოტა ხნის წინ მიიღეს. არსებული ინფორმაციით, მის ადგილზე ახალი სახლი აშენდება.