20 ივნისის ღამეს დაზარალებული მაკო გომური პარლამენტის შენობასთან აქციის სხვა მონაწილეების მსგავსად ითხოვს, რომ არჩევნები სრულად პროპორციული გახდეს. მისი თქმით, ეს ერთადერთი რამ იყო, რასაც სახელმწიფო დათანხმდა.

"ეს უნდა ყოფილიყო არა სახელმწიფოს, არამედ ხალხის მოტანილი. შესაბამისად, იმ ხალხის რომელთაც შეპირდნენ... ახლა ეჭვის ქვეშაა შეასრულებენ თუ არა. როგორცაა ნათქვამი, ქარის მოტანილი ისევ ქარს მიაქვს — აქ პირიქითაა, ხალხის მოტანილი მიაქვს სახელმწიფოს. ცდილობენ დაპირებით ხალხი გააჩუმონ და შემდეგ არ ასრულებენ... ვფიქრობ, რომ მიიღებენ ამ კანონს, რადგან ხალხის აჯანყებას გაექცნენ".

აქცია პარლამენტთან 12 საათზე დაიწყო და თითქმის სამი საათია გრძელდება. მათი მოთხოვნაა, პარლამენტმა არ ჩააგდოს პროპორციულ სისტემაზე გადასვლის წესი. ეს ის პირობაა, რომელიც უმრავლესობამ 20 ივნისის შემდეგ დაწყებული აქციების შემდეგ დადო.