"სერგო, შენ ნებისმიერ დროს ესვრი ილიას", — ამ სიტყვებით მიმართა პარლამენტის ყოფილმა თავმჯდომარემ, ირაკლი კობახიძემ ევროპული საქართველოს დეპუტატს, სერგო რატიანს.

პროპორციულ საარჩევნო სისტემაზე საუბრისას კობახიძემ განაცხადა, რომ ახალი საარჩევნო სისტემით ვერც ნაციონალური მოძრაობა და ვერც ევროპული საქართველო პარლამენტში ვერ უნდა მოხვდნენ. თავისი გამოსვლის რამდენიმე წუთი კობახიძემ ნაციონალური მოძრაობის კრიტიკას დაუთმო. მან, ასევე, განაცხადა რომ ნაციონალურ მოძრაობას გიგლა ბერბიჭაშვილის სინდრომი აქვს.

"კაკო ბობოხიძეც არის ჩვეულებრივი ბერბიჭაშვილი, ნებისმიერ დროს ესვრის ის ილიას. თქვენ ხართ ბერბიჭაშვილები... ამას აკეთებთ ყოველდღიურ რეჟიმში თქვენი პარტიული ტელევიზიის მეშვეობით, თქვენი საიტების მეშვეობით და თქვენი ნაცაქტივის მეშვეობით ფეისბუქზე. ათასობით ადამიანია ჩართული ბერბიჭაშვილის საქმეში", — განაცხადა ირაკლი კობახიძემ.

კობახიძეს სიტყვიერი დაპირისპირება ჰქონდა ოპოზიციის წარმომადგენლებთან. მან ტრიბუნაზე ხელიც დაარტყა და რატიანს უთხრა:

"რას გიზამ იცი, სერგო?! დაგამთავრებ".

ამასთანავე, მან ყოფილ თანაგუნდელზე, ლევან გოგიჩაიშვილზე თქვა, რომ ის ნაციონალურ მოძრაობასთანაა ტანდემში, რის გამოც ისიც ბერბიჭაშვილია.

პროპორციულ წესზე გადასვლას პარლამენტმა კენჭი გუშინ, 12 ნოემბერს არ უყარა. პარლამენტის თავმჯდომარეს არ უთქვამს, რომ პროცესი გადაიდო, თუმცა, სხდომა კენჭისყრის გარეშე დაასრულა. კენჭისყრა, სავარაუდოდ, დღეს გაიმართება. განხილვა უკვე მიმდინარეობს. მანამდე უმრავლესობის სხდომა ჩაინიშნა, სადაც ეს საკითხი განიხილეს.

საკონსტიტუციო ცვლილებას მხარს უჭერდნენ ნაციონალური მოძრაობა და ევროპული საქართველო. ცვლილებას ეწინააღმდეგებოდა ქართული ოცნების რამდენიმე მაჟორიტარი დეპუტატი. უმრავლესობის ზოგიერთი წარმომადგენელი კენჭისყრის გადადებას ითხოვდა.

საპარლამენტო უმრავლესობის მიერ მომზადებული პროექტი 2020 წლის საპარლამენტო არჩევნების პროპორციული სისტემითა და ნულოვანი ბარიერით ჩატარებას ითვალისწინებს. კერძოდ, პოლიტიკური სუბიექტის მანდატების რაოდენობის დასადგენად, პარტიის მიერ მიღებული ხმების რაოდენობა 150-ზე გამრავლდება და არჩევნებში მონაწილე ყველა პოლიტიკური ძალის მიერ მიღებული ხმების ჯამზე გაიყოფა. არჩევნები ნულოვანი ბარიერის პირობებში ჩატარდება. ასევე, ახალი პროექტი საარჩევნო ბლოკების მონაწილეობის შესაძლებლობას არ ითვალისწინებს.

პროპორციული საარჩევნო სისტემა ერთ-ერთი მთავარი მოთხოვნა იყო, რომელიც მოძრაობა #სირცხვილიამ წამუყენა ხელისუფლებას მას შემდეგ, რაც რუსი დეპუტატის, სერგეი გავრილოვის ვიზიტის გამო აქციები დაიწყო. პროტესტის მეხუთე დღეს მმართველ გუნდს დათმობაზე მოუწია წასვლა. პარტიის ლიდერმა, ბიძინა ივანიშვილმა საზოგადოებას ამცნო, რომ 2020 წელს არჩევნებს პროპორციული სისტემითა და ნულოვანი ბარიერით ჩაატარებდნენ.

გაიგე მეტი: