ქართული ოცნების წევრმა და ვიცე-სპიკერმა ზვიად ძიძიგურმა თქვა, ქართული ჩოხის ჰომოსექსუალობასთან დაკავშირება შეურაცხმყოფელია. ამ ტიპის დისკრიმინაციულ განცხადებას დაუთმო მან პლენარულ სხდომაზე გამოსვლის დროის ნაწილი.

"ჩვენთვის, საქართველოს მოსახლეობის უმრავლესობისთვის არის შეურაცხმყოფელი, როდესაც თემა ქართულ ჩოხას, ქართულ ცეკვას უკავშირდება აკავშირებენ ჰომოსექსუალისტების ცხოვრებასთან და, როდესაც ჰომოსექსუალისტები თავის ინტიმურ ცხოვრებას ჩოხის თანხლებით ახორციელებენ ეს არის ქართველი ერისთვის სულში ჩაფურთხება, ამას ვამბობ კონსერვატორების სახელით", — თქვა ზვიად ძიძიგურმა.

ნაცვლად იმისა, რომ პარლამენტის თავმჯდომარეს მისთვის დისკრიმინაციული განცხადება შეეწყვეტინებინა, იმ მოტივით, რომ ზვიად ძიძიგურმა რამდენიმე წუთში სათქმელი ვერ ჩაატია დრო დაუმატა. პარლამენტის ვიცე-სპიკერი დარწმუნებულია, რომ ამ საკითხში ქართული საზოგადოების უმრავლესობა ეთანხმება. ზვიად ძიძიგურმა აღნიშნა, რომ საქართველოს თვითმყოფადობას მისი კულტურა გამოხატავს. მისი თქმით, თვითმყოფადობის ნაწილია საქართველოს ეკლესიაც, რადგან ჩვენი კულტურის სათავეში ქრისტიანული ღირებულებები დგას.