შინაგან საქმეთა სამინისტროს განცხადებით, თბილისში დააკავეს დედა, რომელიც არასრულწლოვანი შვილებს მუშაობას აიძულებდა. უწყების ინფორმაციით, ქალი ფსიქოლოგიური ზეწოლით მათ პეკინის გამზირზე მოწყალების თხოვნას ვალებდა და თუ საკმარის თანხას არ შეაგროვებდნენ, ფიზიკური ანგარიშსწორებით და სექსუალური ძალადობით ემუქრებოდა.

შსს-ში ამბობენ, რომ გამოძიების ფარგლებში, მოსამართლის განჩინების საფუძველზე, რამდენჯერმე განახორციელეს ფარული ვიდეო და აუდიო ჩაწერა, ასევე, ფოტო გადაღება და ფარული სატელეფონო მიყურადება, რითაც ბრალდებულის მიერ არასრულწლოვანი შვილების სისტემატური შრომითი ექსპლუატაცია დადასტურდა. საქმეზე გამოძიება საქართველოს სისხლის სამართლის კოდექსის 143-ე პრიმა-2 მუხლის მე-2 ნაწილის "ბ"ქვეპუნქტით მიმდინარეობს, რაც არასრულწლოვნით ვაჭრობას (ტრეფიკინგს) გულისხმობს. დანაშაული 11-დან 15 წლამდე ვადით თავისუფლების აღკვეთას ითვალისწინებს.