დემოკრატიული მოძრაობა - ერთიანი საქართველოს ლიდერმა ნინო ბურჯანაძემ თქვა, რომ რუსეთში ყველა ვიზიტზე პატრიარქს წინასწარ აყენებდა საქმის კურსში. მისი თქმით, ილია მეორე ერთადერთი ადამიანია, რომელსაც რუსეთში წასვლამდე წინასწარ ხვდებოდა. ამის შესახებ პოლიტიკოსმა ტვ პირველის ეთერში ისაუბრა.

"ზოგადად შემიძლია გითხრათ, რომ მე ყველა წასვლის წინ, როდესაც რუსეთში მივდიოდი, აბსოლუტურად ყოველთვის, წინასწარ ვხვდებოდი პატრიარქს, მას ვაყენებდი საქმის კურსში", — თქვა ნინო ბურჯანაძემ.

ჟურნალისტის კითხვას, თუ რა საჭირო იყო პოლიტიკოსის მხრიდან სასულიერო პირის მსგავს საკითხებზე შეხვედრა, ნინო ბურჯანაძემ უპასუხა, რომ თუ ქვეყნის წინაშე პასუხისმგებელი პირები აზრს კითხავენ პატრიარქს, რომელსაც მოსახლეობის 90% უჭერს მხარეს ამაში ცუდი არაფერია.

რუსეთთან ურთიერთობის დალაგების მსურველი, ნინო ბურჯანაძე ბოლო სინოდის შემდეგ მეუფე პეტრეს გაკეთებულ განცხადებებსაც გამოეხმაურა. პოლიტიკოსი მიიჩენვს, რომ ეს განცხადებები მთელი ერისთვის შეურაცხმყოფელი იყო. ნინო ბურჯანაძის აზრით, ეკლესიის გარშემო მიმდინარე მოვლენები ხელისუფლების მხრიდან საპატრიარქოში "ხელის ფათურის" დამსახურებაა.