ჰომოფობიური ჯგუფის ლიდერი გურამ ფალავანდიშვილი, რომელიც ფილმ And Then We Danced-ის სეანსის ჩაშლას მეორე დღეა ცდილობს, აქტივისტ ანა სუბელიანზე თავდასხმას "მცირე ძალადობად" აფასებს და ამბობს, რომ იმის გამო, რომ ვიღაც არასწორად მოიქცა ვერ გაჩერდებიან. მისი განმარტებით, 9 აპრილის მოვლენების დროსაც კი "ზოგმა ჩვენი მხრიდან გადააჭარბა".

"ნებისმიერ კეთილ გამოსვლას მოყვება ვიღაცა ცხელტვინგაცხელებული, მაშინ არავინ აღარ უნდა გამოვიდეს. ეს გამორიცხულია", — განაცხადა მან On.ge-სთან საუბრისას.

ფილმის სეანსზე მისულ აქტივისტ ანა სუბელიანს ჰომოფობიური ჯგუფის წევრები თავს გუშინ, 8 ნოემბერს დაესხნენ. მისი თქმით, თავში ქვა ან მსგავსი მძიმე საგანი მოხვდა და თვალის დაკარგვას შემთხვევით გადაურჩა. შსს-ს განცხადებით, თავდამსხმელი პირი დააკავეს.

რაც შეეხება 9 აპრილს, 1989 წელს საბჭოთა არმიამ 10 000-იანი მიტინგი დაარბია. სადამსჯელო ღონისძიებებს, ტანკებსა და სასანგრე ნიჩბებს, რომელსაც რუსული ჯარი იყენებდა 21 ადამიანის სიცოცხლე ემსხვერპლა, მათგან 17 ქალია. გარდაცვლილებს შორის ყველაზე უმცროსი 16 წლის იყო.

ჰომოფობიური პროტესტი And Then We Dance-ის წინააღმდეგ

8 ნოემბერს თბილისსა და ბათუმში And Then We Danced-ის ქართული პრემიერის პარალელურად აქციები გაიმართა. თბილისში აქციის ორგანიზატორები ლევან ვასაძე, ქართული მარშის ლიდერი სანდრო ბრეგაძე და ჰომოფობიური დაჯგუფების წარმომადგენლები გურამ ფალავანდიშვილი და დიმიტრი ლორთქიფანიძე იყვნენ. ბრეგაძე და ვასაძე ამირანთან, ხოლო ფალავანდიშვილი გალერეა მოლში იმყოფებოდნენ და სეანსის ჩაშლას ცდილობდნენ.

აგრესიული ჯგუფები მშვიდობიანი მოქალაქეებსა და სამართალდამცავებს პიროტექნიკას და სხვადასხვა ნივთს ისროდნენ, შემდეგ კი პარაკლისი გადაიხადეს. რაც შეეხება ბათუმში გამართულ ჩვენებას, კინოთეატრ აპოლოში დემონსტრანტებმა კვერცხები და შუშხუნები შეყარეს.

პოლიციისა და სპეცრაზმის მობილიზების მიუხედავად, აგრესიული პირების თავდასხმის გამო, თბილისში აქციაზე დაშავდნენ ანა სუბელიანი, დავით ბერძენიშვილი და ერთი პოლიციელი. ხულიგნობისა და პოლიციისადმი დაუმორჩილებლობის ბრალდებით პოლიციამ 27 პირი დააკავა.

მიუხედავად პროტესტისა ჩვენება ყველა კინოთეატრში დაგეგმილ დროს დაიწყო და არცერთი სეანსი არ ჩაშლილა. ჰომოფობიური ჯგუფები დღეს, 8 ნოემბერსაც იკრიბებიან.

ფილმის პრემიერა კანის კინოფესტივალზე 16 მაისს შედგა, პირველი ქართული სასიყვარულო გეი დრამის ჩვენება კი თბილისის კინოთეატრებში 8-10 ნოემბერს იმართება.

And Then We Danced ახალგაზრდა მოცეკვავის, მერაბის ცხოვრების შესახებ გვიყვება, რომელიც რადიკალურად იცვლება, მას შემდეგ, რაც მას ამბიციური მეტოქე შეუყვარდება. მთავარ როლებს ქართველი მსახიობები: ლევან გელბახიანი, ბაჩი ვალიშვილი, ანა ჯავახიშვილი, გიორგი წერეთელი, თამარ ბუხნიკაშვილი და მარიკა გოგიჩაიშვილი ასრულებენ.

და ჩვენ ვიცეკვეთ, რომელმაც არაერთი საერთაშორისო ჯილდო მოიპოვა, ამერიკის კინოაკადემიის დაჯილდოვების 92-ე ცერემონიალზე, საერთაშორისო სრულმეტრაჟიანი ფილმის (იგივე უცხოენოვანი ფილმის) კატეგორიაში შვედეთის სახელითაა გაგზავნილი. მისი რეჟისორი ლევან აკინია, რომელიც წარმოშობით საქართველოდანაა.