მამა გიორგი სხილაძის მიმართ მუქარაზე გამოძიება დაიწყო. სასულიერო პირმა 6 ნოემბერს განაცხადა, რომ ემუქრებოდნენ და გამოძიებისთვის პროკურატურას საჯაროდ მიმართა.

როგორც პროკურატურაში On.ge-ს უთხრეს, სასულიერო პირის მიმართ გამოთქმული მუქარის ფაქტზე შემდგომი რეაგირების მიზნით მასალა გადაეგზავნა შინაგან საქმეთა სამინისტროს, სადაც სისხლის სამართლის კოდექსის 151-ე მუხლის პირველი ნაწილით დაიწყო გამოძიება. აღნიშნული მუხლი სიცოცხლის მოსპობის ან ჯანმრთელობის დაზიანების მუქარას გულისხმობს.

დღეს, 7 ნოემბერს მამა გიორგი სხილაძემ, რომელმაც მეუფე ზოსიმე სტუდენტის მიმართ სექსუალურ ძალადობაში დაადანაშაულა, განაცხადა, რომ მუქარის გამო ქვეყანა დატოვა. მისი თქმით, ახლობლები დაუკავშირდნენ და მოსალოდნელი საფრთხის შესახებ აცნობეს.

"მე არ ვაპირებდი წასვლას და კვირას კიდევ წირვა მქონდა დანიშნული თბილისში, მაგრამ გუშინ დაგვიკავშირდნენ ახლობლები და შეგვატყობინეს, რომ არის რეალური საფრთხე და სასწრაფოდ დავტოვეთ თბილისი. ეს არის საპატრიარქოს მიერ ორგანიზებული, ასე ვთქვათ, ფანატიკური ჯგუფები მომისიონ და სულ მცირე, გამანადგურონ. მეუღლე მახლდა გვერდით და მისი უსაფრთხოების გამო, დავტოვე თბილისი. მივიღე მუქარები", — ამბობს ის.

1988 წლის 23 დეკემბერს მომხდარი სავარაუდო სექსუალური ძალადობის შესახებ მამა გიორგიმ ფეისბუქზე 5 ნოემბერს დაწერა. მან დაასახელა კონკრეტული პირის სახელი და გვარიც, რომელზეც ამბობდა, რომ თბილისის სასულიერო სემინარიაში მაშინდელი რექტორი, ეპისკოპოსი ზოსიმე შიოშვილი "სოდომურად თავს დაესხა" სვეტიცხოვლის რეზიდენციაში. მეუფე ზოსიმემ ბრალდება უარყო და თქვა, რომ ის სექსუალურ ძალადობაში იმიტომ დაადანაშაულეს, რომ პატრიარქს ებრძვიან.

ამავე თემაზე: